SIVARAI 21
Iosepa Ena Kakadia ese Ia Idia Inai Henia
INAI laulau dekenai ia moale lasi merona mani oi itaia. Ia be Iosepa. Iena kakadia ese Aigupito idia lao henia taudia dekenai ia idia hoihoilaia vadaeni. Unuseniai, Iosepa be hesiai tauna ai do ia lao. Dahaka dainai ena kakadia ese unai kara dikana idia karaia? Badina Iosepa dekenai idia mama.
Edia tamana Iakobo ese Iosepa ia ura henia bada. Iena lalokau hahedinaraia totona dabua latana mai hairaina ia karaia bona ia dekenai ia henia. Iosepa ena kakadia 10 idia itaia Iakobo ese Iosepa ia lalokau henia bada neganai, Iosepa idia mama bona inai henia matamaia. To badina ma ta dainai ia idia inai henia danu.
Iosepa be nihi rua ia abia. Unai nihi rua lalonai ena kakadia be ena vairanai idia tui diho. Iosepa be ena kakadia dekenai unai nihi ia gwauraia neganai, ia idia inai henia momokani.
Dina ta Iosepa ena kakadia be edia tamana ena mamoe idia naria noho neganai, Iakobo ese Iosepa ia siaia idia ia itaia totona. Iena kakadia be daudau amo ia idia itaia neganai, haida idia gwau: ‘Ita alaia!’ To edia kakana, Rubena ia gwau: ‘Lasi, unai bamona umui karaia lasi!’ To, Iosepa idia dogoatao bona ia kaukau ranu gurina lalonai idia negea. Bena idia helai bona ia dekenai do idia karaia gauna idia laloa.
Unai neganai, Isamaela taudia haida idia mai. Iuda be ena tadikaka ia hamaoroa: ‘Isamaela taudia dekenai ita hoihoilaia.’ Bona unai bamona idia karaia. Iosepa be siliva moni 20 amo idia hoihoilaia. Unai be hebogahisi lasi karana momokani!
Unai tadikaka be edia tamana dekenai dahaka do idia gwau? Nani ta idia alaia bona ena rara lalonai Iosepa ena dabua hairaina idia atoa loulou. Bena edia tamana Iakobo dekenai dabua idia abia lao bona idia gwau: ‘Inai ai davaria. Oi itaia, inai be Iosepa ena dabua eiava lasi?’
Iakobo ia itaia neganai, ia diba unai be Iosepa ena dabua. Ia tai bona ia gwau: ‘Reana uda boroma ta ese Iosepa ia alaia vadaeni.’ Bona Iosepa ena tadikaka idia ura edia tamana be unai bamona ia laloa. Iakobo ia lalohisihisi bada. Dina momo ia taitai. To Iosepa ia mase lasi. Ia idia abia lao gabuna dekenai ia vara gauna mani ita itaia.
