Ngewa ya 21: Ana-a-Ĩthe ma Yosevu Nĩmamũmenie
KWASISYA ũndũ kĩmwana kĩĩ kĩmakĩte na kĩte na wĩkwatw’o. Ũũ nĩ Yosevu. Ana-a-ĩthe make nĩmamũthooisye kwa andũ aa maĩ nzĩanĩ maendete Misili. Athi kũu Yosevu atwiwe ngombo. Nĩkĩ ana-a-ĩthe meekie ũndũ ũsu mũthũku? Meekie ũu nũndũ nĩmamwĩw’ĩaa Yosevu kĩwĩu.
Ĩthe woo Yakovo nĩwamwendete Yosevu mũno. Nĩwamwonisye wendo kwa kũmũtumĩthĩsya kanzũ mbanake. Yĩla akũũe make 10 moonie kana Yakovo nĩwendete Yosevu mũno, nĩmambĩĩie kũmwĩw’ĩa kĩwĩu na kũmũmena. Ĩndĩ kwaĩ na kĩtumi kĩngĩ kĩla kyatumĩte mamũmena.
Yosevu nĩwaotie ndoto ilĩ. Nthĩnĩ wa ndoto sya Yosevu syelĩ ana-a-ĩthe make nĩmamũkumanĩie. Yĩla Yosevu wamatavisye ana-a-ĩthe ũvoo wa ndoto isu, kĩmena kyoo nĩkyongelekile mũno.
Na yu mũthenya ũmwe yĩla akũũe ma Yosevu maĩthasya malondu ma ĩthe woo, Yakovo nĩwamũtũmie Yosevu aende akasisye kana no aseo. Yĩla ana-a-ĩthe moonie okĩte, amwe moo masya: ‘Tũmũaei!’ Ĩndĩ Leuveni mwana-a-ĩthe ũla mũkũũ, amea: ‘Aiee, mũikeke ũu!’ Kwoou vandũ va kũmũaa mamũkwata Yosevu na mamwĩkya ĩimanĩ yĩte kĩw’ũ. Na ĩndĩ mekala nthĩ masũanĩe ũndũ mekwĩkana nake.
O kavindanĩ kau andũ amwe Aisumaeli mesĩla vau. Na Yuta amea ana-a-ĩthe make: ‘Tũmũthoosyei kwa Aisumaeli.’ Na ũu nĩw’o meekie. Nĩmamũthooisye Yosevu ilungu 20 sya vetha. Yĩu yaĩ yĩko ya kwĩyenda na yĩte ya tei ta kĩ!
Ana-a-ĩthe meeie ĩthe woo ata? Mo mooaie mbũi na mainda kanzũ mwanake wa Yosevu ĩngĩ na ĩngĩ nthakamenĩ ĩsu ya mbũi. Na ĩndĩ makua kanzũ ũsu matwaa mũsyĩ kwa ĩthe woo Yakovo na mamwĩa: ‘Tũneethĩie kanzũ ũũ. Ũsisye, wone kana ti ũla wa Yosevu.’
Yĩla Yakovo waũsiisye eethĩa nĩw’o. Nake akaya ayasya, ‘No nginya Yosevu ethĩwe nũlĩkĩte nĩ nyamũ mbai.’ Na ũu nĩw’o ana-a-ĩthe ma Yosevu meendaa ĩthe woo esilye. Yakovo nĩweewie kyeva kingĩ mũno. Nĩwaĩie mĩthenya mingĩ. Ĩndĩ Yosevu ndaĩ mũkw’ũ. Ekai twone kĩla kyamũkwatie kũla watwaiwe.
Mwambĩlĩlyo 37:1-35.
Makũlyo
- Nĩkĩ ana-a-ĩthe ma Yosevu mamwĩw’ĩaa kĩwĩu, na meekie ata?
- Ana-a-ĩthe ma Yosevu meendaa kũmwĩka ata, ĩndĩ Leuveni emeie ata?
- Kweekĩkie ata yĩla atandĩthya Aisumaeli mavĩtĩle vau?
- Ana-a-ĩthe ma Yosevu meekie ata nĩ kana matume ĩthe woo asũanĩa kana Yosevu aĩ mũkw’ũ?
Makũlyo ma kwongeleela
- Soma Mwambĩlĩlyo 37:1-35.
Aklĩsto matonya ata kũatĩĩa ngelekany’o ya Yosevu kwa kũweta mavĩtyo ma andũ kĩkundinĩ? (Mwa. 37:2; Ali. 5:1; 1 Ako. 1:11)
Nĩ kyaũ kyatumie ana-a-ĩthe ma Yosevu mamwĩka maũndũ ma ũseleke? (Mwa. 37: 11, 18; Nth. 27:4; Yak. 3: 14-16)
Nũndũ mwaũ weekawa ĩvinda ya kũmeta ũla Yakovo weekie? (Mwa. 37:35)
