TARORA kamwana kau ũrĩa karĩ na kĩeha na kwaga mwĩhoko. Ũyũ nĩ Jusufu. Ariũ a ithe no hĩndĩ mamwendia kũrĩ andũ aya me rũgendo-inĩ rũa gũthiĩ Misiri. Akinya kũu Jusufu egũtuo ngombo. Nĩ kĩĩ kĩratũma ariũ a ithe mamwĩke ũũru ũguo? Gĩtũmi nĩ ũndũ wa kũiguĩra Jusufu ũiru.

Ithe wao Jakubu nĩendete Jusufu mũno makĩria. Nĩamũtugire na ũndũ wa kũmũthondekera kanjũ ndaya na thaka mũno. Rĩrĩa ariũ a ithe 10 monire ũrĩa Jakubu eendete Jusufu-rĩ, nĩ maambĩrĩirie kũmũiguĩra ũiru na kũmũthũũra. No ningĩ nĩ kwarĩ na gĩtũmi kĩngĩ kĩrĩa gĩatũmire mamũthũũre.

Jusufu aarĩ na iroto igĩrĩ. Iroto-inĩ icio cierĩ ariũ a ithe nĩ mamũinamĩrĩire. Rĩrĩa Jusufu eerire ariũ a ithe ũhoro wa iroto icio-rĩ, rũthũũro rwao rũkĩongerereka makĩria.

Rĩu mũthenya ũmwe rĩrĩa ariũ a ithe arĩa akũrũ maarĩithagia ng’ondu cia ithe wao-rĩ, Jakubu akĩĩra Jusufu athiĩ akone kana nĩ ahoro. Rĩrĩa ariũ a ithe monire Jusufu agĩũka, amwe ao makiuga: ‘Kĩrekei tũmũũrage!’ Ĩndĩ Reubeni ũrĩa warĩ mũkũrũ wao akiuga ũũ: ‘Aca, mũtigeke ũguo!’ Handũ ha ũgũo-rĩ, maanyitire Jusufu na kũmũikia gĩthima-inĩ kĩhũu. Magĩgĩikara thĩ meciirie ũrĩa me kũmwĩka.

O kahinda-inĩ kau-rĩ, gĩkundi kĩa arũme a Aishumaeli gĩgĩkinya. Juda akĩĩra ariũ a ithe ũũ: ‘Rekei tũmwenderie Aishumaeli aya.’ Na ũguo no guo meekire. Makĩendia Jusufu cekeri 20 cia betha. Kaĩ ũũ nĩ ũũru na kwaga tha-ĩ!

Ariũ a ithe mekwĩra baba wao atĩa? Moragire mbũri na makĩrikia kanjũ ĩrĩa thaka ya Jusufu thakame-inĩ maita maingĩ. Rĩu magĩtwarĩra ithe wao kanjũ ya Jusufu mũciĩ na makiuga: ‘Nĩ kũmĩona twamĩona. Ta mĩrore, wone kana nĩyo kanjũ ya Jusufu.’

Jakubu akĩona nĩyo. Akĩanĩrĩra akiuga, ‘No mũhaka Jusufu akorũo oragĩtwo nĩ nyamũ ya gĩthaka.’ Ũguo nĩguo ariũ a ithe na Jusufu mekwenda ithe wao eciirie. Jakubu aarĩ na kĩeha mũno. Akĩrĩra matukũ maingĩ. No ĩndĩ Jusufu ndakuĩte. Tareke tuone ekirũo atĩa kũrĩa aatwarirũo.