OLHUGHANO 21
Baghalha Babu Yozefu Bakamupona
THALHANGIRA omulhwana ngokw’asusumene n’eriyibulha-bulha. Oyu ni Yozefu. Baghalha babu mubana mabiri mughulya okw’abalhume aba abali okwa lhughendo lhwabu olhwe Misiri. Yozefu akendi yakolhwa mwa mukobe eyo. Busana naki baghalha babu bakolire ekindu kibi eki? Ni busana bakwire oku Yozefu kw’obuha.
Yakobo thatha wabu aby’anzire Yozefu ya kutsibu-tsibu. Mwa mukangania olhwanzo omwi mukolera erikoti eryuwene. Baghalha babu abakulhu-bakulhu babere balhangira Yakobo kw’anzire Yozefu ya kutsibu, mubatsuka eribya n’obuha n’eripona Yozefu. Aliriryo hanabya n’eyindi nzumwa eyaleka ibamupona.
Yozefu mwalhotha ebilhotho bibiri. Omwa bilhotho bya Yozefu ebyosi baghalha babu ibaka munamira. Yozefu abere abiri bwira baghalha babu b’ebilhotho ebi, eripona lyabu mulyakanyirira.
Neryo hathya kiro kighuma baghalha babu Yozefu abakulhu-bakulhu bane mulisya esyambuli sya thatha wabu, Yakobo amabwira Yozefu athi aghende alebaye ngokw’abaghalha babu bali. Baghalha babu bamabya balhangira Yozefu akasa, abandi bamabugha bathi: ‘Thumwithe!’ Aliriryo Rubeni, mughalha wabu omukulhu, amabugha athi: ‘Eyihi, si mukole ekyo!’ Omwa mwanya w’ekyo bamahamba Yozefu n’erimughusa omwa kyuna ekyumire mw’amaghetse. Neryo bak’ikalha ahisi bakalengekania eky’erimukolera.
Okwa buthuku buno abalhume Abaismaeli bakatsubuka. Yuda akabugha n’abaghalha babu abandi: ‘Muleke thumughulhaye okw’Abaismaeli.’ N’ekyo kya bakakolha. Bakaghulhaya Yozefu y’ebihandi 20 eby’esy’ebitsipa. Ka kyabya kindu eky’obusindwa n’eky’erithendikwa lhukeri!
Baghalha babu bakendi bwira thatha wabu yaki? Bak’itha embene n’erinighira erikoti lya Yozefu eryuwene ly’omwa musasi wayu. Neryo bakathwalha erikoti ry’eka eyiri thatha wabu Yakobo n’eribugha bathi: ‘Mwathukabana eki. Thasamalira, wulhangire nga si rikoti lya Yozefu.’
Yakobo amalhangira iniryo. Neryo akalira athi, ‘Ekisoro eky’omwali kyanganabya ekyabiri itha Yozefu.’ Baghalha babu Yozefu banzire thatha wabu kwa lengekanaye athya. Yakobo akasusumana kutsibu. Akalira ahabw’ebiro bingi. Aliriryo Yozefu syaholire. Thuthalebya ekika muhikako eya bamamuthwalha.
