NUAWƆ se mɛɛ poombɔɔ tambu kɔllɛ, nduyɛ o nɔ tiindaŋ fulaa leniŋ te. Choosɛ cho hoo ni. Bɛndaa nduaa laŋga pisi ndu suŋsuŋ puaa cho haa kɔndaŋ Ichipi wa o ba. Loŋ Choosɛ cho lakɔ simnɔŋ chiɔɔ ni. Leyɛɛ bɛndaa nduaa finya piliaa tosallɛ ndu iwɔɔŋ waa naa? Kanifuule ndaa nɔ bɔɔ kɔl paŋalɛiyo le ndu.

Chekɔpu finya nda ndoo kaala bɔɔ Choosɛ. Le chɔmndo maa o kaala ndu, mbo sondul ndu doma vilɛi kɛndɔɔ pila. Mɛɛ bɛndaa nduaa tɔa che kpɛ mɛɛ Chekɔpu finya nda kaala Choosɛ yɛ, ma kandu ndu paŋalaa, vɛlɛ ma tul ndu leyɛ. Kɛ sabu cheleŋ wa vɛlɛ okoŋ kɔɔli le nyɛ nda tul ndu yɛleŋndo.

Mi Choosɛ sɔl luaŋ le diiŋ. O lɔmasɔlaŋ maŋ niŋ kpou, mi bɛndaa nduaa baŋ wulaŋ naa ndu cha. Mɛɛ Choosɛ chɔm bɛndaa nduaa luaŋ maŋ, mi yaamɔɔleŋ le chɔɔlu kuufaŋ mi le hiau maa paandu.

Paale pilɛ mɛɛ bɛndaa nduaa wa saa finya ndaa ikɛi, mi Chekɔpu viam Choosɛ le mbo kɔ nua nda te a cho pɛ kɛndɛ. Mɛɛ bɛndaa nduaa che ndu Choosɛ kalaa hunɔɔ, mi apum dimi aa: ‘Ŋ diiŋ ndu!’ Kɛ mi bɛnda bɛndoo Lubɛŋ dimi aa: ‘Sako, la tosa keŋ te!’ Okoŋ, ma saala ndu kpau ma wou ndu o sooŋ mamɛŋ velɛiyo niŋ. Mɛɛ nda wou ndu loŋ, ma chal niko kɛɛsiaa le nyɛ kpeekpei nda cho tosa a ndu wo.

O boondii keŋ bɛŋgu, mi puaa Isimaliiya apum wa hiouwɔɔ. Mi Chuda dimul puaa piliaa nduaa aa: ‘Ŋ pisiŋ ndu o Isimaliiya haa lo.’ Nduyɛ keŋ nda tosa ni. Ma pisi ndu le kaniŋ humboŋ bidiiŋ. Ɔɔ kɔl vesɛi hiou hoo wo!

Yɛɛ nda cho yɛ niko lakɔ finya nda dimul? Okoŋ, ma dii chuiŋndo ma lɔŋgɔla doma kɛndɛ Choosɛ koŋ o kooma chuiŋ koŋ niŋ, ma chua doma koŋ lende ma you Chekɔpu finya nda, ma dimul ndu aa: ‘Nuawɔ doma naŋ saaluŋ hoo wo, o cho doma Choosiɔɔ le?’

Mi Chekɔpu cha maa doma po ndɔɔ ni. Mbo dimi o chaŋndo niŋ kpeleŋ aa: ‘Visi biyaa diillul la Choosɛ po ni fɔ.’ Lende kpeekpei bɛnduaa Choosɛa ndaa yeema ni mi finya nda ndoo dimi. Mi Chekɔpu tambu kɔl tau, mbo chaŋ Choosɛ le palɛi bɔɔ bɔɔ. Kɛ Choosɛ vi le. Yɛɛnɛ kɔ yɔŋnuŋ yɛ ndu naa nda kuɛ a ndu wa? Ŋ tofaŋndɔ.