ACI tale ou mukuendze a li mu vusiua na ku zeya. Ikeye Yosefe. Vamuanaye va na mu landesa kuli ava vamala vali na kuya ku Ingito. Yosefe va ka mu puisa ndungo ku Ingito. Vika ava vamuanaye kuli ise va na lingila cuma ca ku pihia ngeci? Muomu vali na cipululu ca Yosefe.

Iseavo Yakomba ua lemene cikuma-kuma Yosefe. Ngeci ua mu tongelele cimo cikovelo ca cili. Omo vamuanaye 10 va ku kola va muene ngecize Yakomba ua lemene Yosefe cikuma, va putukile ku mu vuila cipululu na ku mu zinda. Vunoni kua kele vikuavo via lingisile mangana va mu zinde.

Yosefe ua lotele vilota vivali. Mu vilota viaco Yosefe ua muene vamuanaye va na tsikama kuli ikeye. Omo Yosefe ua vi zimbuile kuli vamuanaye, cizindo cavo ca likulisile cikuma.

Tangua limo omo vamuanaye ya Yosefe va vakuluntu vakele na ku lisa vampanga va iseavo, Yakomba ua tumine Yosefe mu ku mona vamuanaye nga va li mua cili. Omo vamuanaye va muene Yosefe a li na ku iza, vamo va handekele nguavo: ‘Tu mu tsihienu!’ Vunoni Luvene, muanaye ua mukuluntu, ua handekele ngueni: ‘Houe, kati mu linge ngoco!’ Ngeci va kuatele Yosefe na ku mu mbila mu cipuku ca ku uma. Kaha va tumamene na ku singanieka vati va mu linga.

 Ha ntsimbu ize, kua hitile cendo ca vaIsmaelita. Yunda ua lekele vamuanaye ngueni: ‘Tu mu landesienu kuli vaIsmaelita.’ Mukemuo mu va na lingi. Va na mu landesa 20 a zimbongo zia palata. Ovu vua puile vupi na vuhenge vua kama!

Vati va ka mu ambulula kuli ise? Va na tsihi cizamba ca mpembe na ku zavazieka mu maninga cikovelo ca cili ca Yosefe. Kaha va tualele cikovelo ceni kuimbo kuli iseavo nguavo: ‘Tu na uana eci cikovelo. Ci tale, nga kati cikovelo ca Yosefe.’

Kaha Yakomba aci tale, cikeco. Kaha ua lilile ngueni ‘Kasitu ua mu musenge na muli.’ Vamuanaye ya Yosefe va tonda nguavo ise a tave ngueni cili vene muaneni na liua. Yakomba a li mu vusona vua kama cikuma. Kaha na liniengeye matangua a engi. Nkuma Yosefe ka tsile. Tu tale vika via ka mu solokelele kuze ku va mu tualele.