Ikniuan José kitauelitakej
Tanojnots 21
Ikniuan José kitauelitakej
¡XIKITA nejin telpoch, tekneltij, semi tayokoxtok! Motokaytia José. Ikniuan yekin kinamakakej imimako nejin takamej tein youij Egipto. Ompa kitekitiltitij José. ¿Keyej itakpaikniuan kichiuilijkej nejin tachiualis tein amo kuali? Porin kinexikoluiayaj José.
Imin popaj, Jacob, kiteltasojtaya José. Yejika kichijchiuilij se ueyak taken tel kuakualtsin. Keman majtakti ikniuan tein tayekanayaj kiitakej ika Jacob kiteltasojtaya José, okachi kinexikoluijkej uan kitauelitakej. Sayoj ika, onkaya okse taman keyej kitauelitayaj.
José kipiak ome takochitalis. Ompa kiitak ika ikniuan moixpilouayaj iixpan. Okachiok kitauelitakej ikniuan keman kintapouij tein kikochitak.
Se tonal, keman ikniuan José tein tayekanayaj, kintakualtijtoyaj ichkamej, Jacob kititanik José maj kinitati. Keman kiuejkaitakej, sekin ikniuan moiluijkej: ‘¡Maj tikmiktikan!’ Sayoj ika, Rubén, tein tayekanaya kiniluij: ‘¡Amo xikchiuakan nejon!’ Okachi kuali kipankalakijkej itech se taltekoch. Ompa peuak kinemiliaj toni kichiuiliskej imin ikniuj José.
Keman kinemilijtoyaj toni kichiuaskej, kinitakej seki ismaelitas. Judá kiniluij itakpaikniuan: ‘Maj tikininamakiltikan ismaelitas’. Uan yejua tein kichiujkej. ¡Kinamakakej José ika 20 platajtomin! ¡Tel ika mauiltijkej!
¿Toni kiiluiskiaj imin popaj? Kimiktijkej se cabra uan itech iesyo, miakpa kipankalakijkej itaken José. Ompa kiuikilijkej taken imin popaj uan kiiluijkej: ‘Tikajsikej nejin. Xikita, itaken José’.
Keman Jacob kiixmatik, kijtoj chikauak: ‘Se kuoujtajtekuani kimiktij José’. Yejua nejon kinekiaj ikniuan José maj kinemiliani imin popaj. Jacob moteltayokoltij. Kichokilij miak tonalmej. Sayoj ika José amo momikilij. Maj tikitakan toni kipanok kampa kiuikakej.
