TLAPOUALISTLI 21

Ikniuan José okikokolijkej

¡XIKITA ken moyolkokoa nin telpochtli! Itoka José. Ikniuan okinemakakej innauak ninmej tlakamej tlen yauij Egipto. Ompa, José kitlaliskej ken se tlakeuali. ¿Tleka okichiuilijkej itlakpaikniuan nin tlamantli amo kuali? Pampa okinexikolitayaj José.

Jacob intajtsin, okitlasojtlaya, okitlasojtlaya miak José. Uan ijkon okiteititi ijkuak okichijchiuili se itlaken kuajkualtsin uan ueyak. Ijkuak majtlaktli ikniuan akinmej tlayekanaj okitakej ken Jacob okitlasojtlaya miak José, opejkej kinexikolitaj uan kikokoliaj José. Noijki okatka okse tlamantli pampa okikokoliayaj.

José okipixki ome kochtemikilistli. Itech ome ikochtemikilis José okitak ken ikniuan omotlankuaketsayaj ixpan. Ikniuan José okachi okikokolijkej ijkuak okintlapoui tlen okochtemik.

Se tonal, ijkuak ikniuan tlen tlayekanaj okintlajpixtokaj ichkauan intajtsin, Jacob okinauati José ma kinmitati uan ma kita kox kuali okatkaj. Ijkuak ikniuan okitakej ompa oyaya José, sekimej okijtojkej: ‘¡Ma tikmiktikan!’. Uan ikni Rubén tlen otlayekanaya, okijto: ‘¡Amo, amo xikchiuakan non!’. Amo okimiktijkej, okitlamotlakej José ijtik se atekochtli tlen amo okipiaya atl. Ijkuakon, omotlalijkej uan omotlapouijkej tlen kichiuiliskiaj José.

Ijkuakon, ompa opanokej sekimej ismaelitas. Judá okinmilui itlakpaikniuan: ‘¡Ma tikinnemakiltikan ismaelitas!’. Uan ijkon okichijkej. ¡Okinemakakej José ika 20 platajtomin! ¡Melauak amo kuali tlen okichiuilijkej!

¿Tlen kiluiskiaj intajtsin? Okimiktijkej se tentso uan itlaken José tlen okatka kuajkualtsin miakpa okipolaktijkej ijtik ieso tentso. Ijkuakon, itlaken José okiuikilijkej intajtsin Jacob uan okiluijkej: ‘Otikajsikej nin. Xikita kox itlaken José’.

Jacob okixmatki itlaken José. ‘Uelis se tekuani okimikti José’, otsajtsik. Ikniuan José ijkon okinekiayaj ma mokuayejyeko intajtsin. Jacob omoyolkoko miak. Miak tonalmej okichokili ikone. Maski ijkon, José amo omikik. Ma tikitakan tlen okipanok kanin okiuikakej.

Génesis 37:1-35.