ONOONO la kua momoko mo e nakai fai amaamanakiaga e tama taane nei. Ko Iosefa anei. Ko e fakafua atu laia he tau matakainaga po ke lafu haana a ia ke he tau tagata nei hane o atu ki Aikupito. I ai to eke a Iosefa mo tupa. Ko e ha ne taute he lafu haana e mena kelea nei? Ha kua mahekeheke a lautolu ki a Iosefa.

Ko e matua taane ha lautolu ko Iakopo ne ofania lahi mahaki a Iosefa. Fakakite e ia e fiafia haana ki a Iosefa he taute e tapulu loa fulufuluola ma haana. Magaaho ne kitia he lafu taokete toko 10 haana kua ofania lahi mahaki e Iakopo a Iosefa, ne kamata a lautolu ke mahekeheke mo e vihiatia a Iosefa. Ka e fai kakano foki ati vihiatia e lautolu a ia.

Ne ua e miti ha Iosefa. He tau miti ia ha Iosefa ne fakaveveli hifo e tau lafu haana ki a ia. He magaaho ne tala age e Iosefa e tau miti ia ke he lafu haana, ne au atu e vihiatia ha lautolu ki a ia.

He taha aho, magaaho ne leveki ai he tau taokete ha Iosefa e tau mamoe he matua taane ha lautolu, ne ole a Iakopo ki a Iosefa ke fano ke aahi a lautolu. Ne kitia he lafu ha Iosefa a ia ne hau, ti pehē e falu ia lautolu: ‘O mai a ke kelipopo a ia!’ Ka e pehē a Reupena ko e uluaki he lafu: ‘Nakai, ua taute e mutolu e mena ia!’ Ka e tapaki e lautolu a Iosefa ti tuku a ia ki loto he vai keli kua magomago. Ati nonofo hifo a lautolu ke manamanatu ko e heigoa ka taute aki a ia.

He mogonei, ne o mai e tau tagata Isamaeli. Ne tala age a Iuta ke he lafu haana: ‘O mai ke fakafua atu a ia ke he tau tagata Isamaeli.’ Ti taute pihia ai e lautolu. Ne fakafua e lautolu a Iosefa ke he 20 e tupe. Ko e kelea mo e vale ha ia he mena ia!

Ko e heigoa he lafu ka tala age ke he matua taane ha lautolu? Ne tamate e lautolu e koti ti fuifui lagaloga e tapulu loa fulufuluola ha Iosefa ke he toto he koti. Ti uta e lautolu e tapulu loa ki kaina ke he matua taane ha lautolu ko Iakopo mo e pehē: ‘Ne moua e mautolu e mena ē. Kikite la ki ai, ke kitia ko e tapulu nakai ha Iosefa.’

Ne kitia e Iakopo ko e tapulu ha Iosefa. ‘Kua kai tuai he manu favale a Iosefa,’ he ui e ia. Ne manako tuai ni e lafu ha Iosefa ke pihia e manatu he matua taane ha lautolu. Ne momoko lahi mahaki a Iakopo. Ti loga e aho ne tagi ai a ia. Ka e nakai mate a Iosefa. O mai la ke kitia ko e heigoa ne tupu ki a ia he matakavi ne uta a ia ki ai.