¡QAWAY, kay mozoqa llakisqallañam kachkan! Payqa Joseymi. Wawqenkunam Egipto nacionman riq runakunaman rantikururqaku. Chaymanmi Joseyta apanqaku sirviente kananpaq. ¿Imanasqataq wawqenkunaqa chayna mana allintaqa ruraramunku? Joseyta envidiakuspanku.

Paykunapa taytan Jacobqa llumpaytam Joseytaqa kuyarqa. Kuyasqantam qawachirqa sumaq qoysuneq pachata rurapuspan. Joseyta taytan Jacob kuyasqanta 10 mayor kaq wawqenkuna qawaruspanku envidiakuspa cheqniytapas qallarirqaku. Chaymantapas huk kaqmantawan paytaqa cheqnirqaku.

Iskay kutipim Joseyqa mosqokurqa. Chay iskaynin mosqoyninpim Joseypa wawqenkunaqa ñawpaqninpi kumuykuchkarqaku. Wawqenkunaqa astawanraqmi Joseytaqa cheqnirqaku mosqosqanmanta willakuptin.

Huk kutipim, Joseypa mayor wawqenkuna taytanpa ovejankunata michichkaptinku, Jacobqa Joseyta aviarqa wawqenkuna imayna kasqankuta qawamunanpaq. Joseypa wawqenkuna paykunaman chayamuchkaqta rikuruspanku wakinmi ninakurqaku: ‘¡Wañurachisunchik!’ nispa. Chaymi mayor kaq wawqen Rubenmi nirqa: ‘¡Ama wañuchisunchikchu!’ nispa. Wañuchinankumantaqa, mana yakuyoq chaki pozomanmi Joseyta kachaykurqaku. Chaymantam tiyakurqaku Joseyta ima ruranankuta tanteanakunankupaq.

Chayta rurachkaptinku Ismael casta runakuna hamuchkasqaku. Chaymi wawqenkunata Juda nirqa: ‘Ismael runakunamanyá rantikurusunchik’ nispa. Hinaspa chaytam rurarqaku. ¡Joseyta rantikururqaku 20 qollqepaq! ¡Mana kuyakuspa millakuypaqmi rurasqankuqa karqa!

¿Imatam taytantaqa Joseypa wawqenkuna ninqaku? Chivatochata wañurachispanku achka kutitam sumaq pachanta yawarninpi chapururqaku. Chaymi taytanku Jacobman chay pachata apaspanku nirqaku: ‘Kayllatam tariruniku, reqsiy kayta churikipa pachanchu icha manachu’ nispa.

Jacobmi pachanta reqsiykurqa. ‘Purun animalchiki paytaqa mikurun’ nispam waqallarqa. Taytan chaynata piensananta Joseypa wawqenkunaqa munarqaku. Jacobmi llumpayllataña llakikururqa. Achka punchawta waqallanpas. Joseymi ichaqa mana wañunchu. Qawasunchikyá imataq payta pasarqa apasqanku lawpi.