AKARA ana i te tu maromaroa o teia tamaiti, kare e mataora ana. Ko Iosepha teia. Kua oko uaia akenei aia e tona au tuakana ki tetai au tangata e aere ra ki Aiphiti. Ka akariroia a Iosepha ei tuikaa me tae ki reira. Eaa tona au tuakana i rave ei i teia angaanga kino? No to ratou vareae ia Iosepha.

E akaperepere ana to ratou papa ko Iakoba ia Iosepha. Kua akaari aia i tona mareka na te maani anga i tetai pereue manea, roangarere nona. I te kite anga tona au tuakana e 10 i te inangaro maata o Iakoba no Iosepha, kua vareae e kua riri ratou ia Iosepha. Inara e tumu ke atu tetai i riri ei ratou iaia.

E rua a Iosepha moemoea. I roto i teia nga moemoea na Iosepha, te tupou ra tona au tuakana kiaia. I te akakite atu anga a Iosepha i teia nga moemoea nana, maata roa atu to ratou riri iaia.

Ina i tetai ra, i te au tuakana o Iosepha e tiaki ra i te au mamoe a to ratou papa, kua pati a Iakoba ia Iosepha kia aere e akara e te peea ra ratou. I te kite anga te au tuakana o Iosepha iaia e aere maira, kua karanga tetai pae ia ratou e: ‘Ka ta tatou iaia!’ Karanga mai te tuakana ko Reubena e: ‘Kare, eiaa kotou e akapera!’ Kua opu ra ratou ia Iosepha e kua titiri iaia ki roto i tetai vaarua kua maro te vai. I reira kua noo ratou ki raro i te akamanako e ka akapeea ratou iaia.

Kare i roa kua aere mai tetai au tangata ngati Isemaela. Karanga atu a Iuda ki tona au teina e te au tuakana e: ‘Ka oko tatou iaia ki te ngati Isemaela.’ E ko tera tikai ta ratou i rave. Kua oko ratou ia Iosepha no te nga ario e 20. E angaanga kino tikai tera e te tangi kore!

Eaa ra ta te au tuakana ka akakite ki to ratou papa? Kua ta ratou i tetai puakanio e kua tuku i te pereue manea o Iosepha ki roto i te toto puakanio. I reira kua apai ratou i te pereue ki te kainga i to ratou papa ia Iakoba e kua karanga atu e: ‘Kitea mai e matou teia. I na kia akara, me no Iosepha rai teia pereue.’

Akara a Iakoba, ae nona rai. ‘Kua taia paa a Iosepha e te manu taetaevao,’ i aue ei aia. E ko te reira tikai ta te au tuakana o Iosepha i inangaro i to ratou papa kia manako. Maata tikai te mii o Iakoba. Kua aue ua aia i te au ra i aereia. Inara kare a Iosepha i mate. Ka akara ana tatou e eaa tei tupu kiaia i te ngai i apai ia ai aia.