BÂ TONGANA nyen maseka-koli so ayeke na vundu mingi, na mbeni ye ti tene lo sara ayeke dä pëpe. Maseka-koli so ayeke Joseph. Aita ti lo alondo ti kä lo na akoli so ayeke gue na Égypte . Na Égypte , Joseph ayeke ga ngbâa. Aita ti lo asara tongaso ngbanga ti nyen? Bê asara ala na tere ti lo.

Babâ ti ala Jacob aye Joseph mingi. Lo sara na Joseph mbeni pendere yongoro bongo. Tongana ayaya ti lo 10 abâ so Jacob aye Joseph mingi ahon ala, kota bê asara ala na ala ke lo. Me mbeni tënë nde ayeke nga dä so ndali ni ala ke lo.

Joseph abâ li ti lo lege use. Na yâ ti abango li use so, aita ti lo akuku na gbele lo. Tongana Joseph afa peko ti abango li ti lo na aita ti lo, ala kiri ake lo ahon ti kozo.

Mbeni lâ, tongana ayaya ti Joseph ayeke bata anyama ti babâ ti ala, Jacob ahunda na Joseph ti gue ti bâ ala yeke tongana nyen kâ. Tongana aita ti lo abâ lo na gango ni, ala tene: ‘Zia e fâ lo!’ Me Ruben, kozo molenge ni, atene na ala ti sara tongaso pëpe. Tongaso, ala gbu lo abi lo na yâ ti mbeni dungu so ahule awe. Na pekoni, ala duti ti gbu li ti ala na ndo ye so ala lingbi ti sara na lo.

Mo ye ti bâ, ala bâ azo ti mara ti Ismaël ayeke ga. Juda atene na aita ti lo: ‘Zia e kä lo na azo ti mara ti Ismaël!’ Ala sara tongaso. Ala kä Joseph teti nginza ti argent 20. So tâ ye ti sioni!

Ala yeke tene ande nyen na babâ ti ala? Bâ ye so ala sara: ala fâ mbeni ngasa na ala yôro bongo ti Joseph na yâ ti mênë ti ngasa ni lege mingi. Ala mû bongo ni na ala gue afa ni na babâ ti ala, ala tene: ‘Bongo ti Joseph la pëpe?’

Jacob abâ ni na atene: ‘Mbeni nyama ti ngonda la ate Joseph!’ So ayeke ye so aita ti Joseph aye fade ti tene babâ ti ala amä na bê dä la. Vundu asara Jacob mingi. Lo toto lango mingi. Me Joseph akui pëpe. Zia e bâ ye so asi na lo na sese ti Égypte .