LUKU fa a boi e sari, a lasi ala howpu. Disi na Yosef. Den brada fu en seri en dyonsrode gi den man disi di de na pasi e go na Egepte. Drape Yosef sa tron wan srafu. Fu san ede en afu-brada du so wan takru sani? Bika den dyarusu nanga en.

Den papa, Yakob, ben lobi Yosef srefisrefi. Fu dati ede a ben meki wan langa dyakti gi en di ben moi. Di den tin bigi brada fu Yosef ben si o furu Yakob ben lobi Yosef, dan den bigin dyarusu, den no ben man si Yosef na ai. Ma wan tra sani ben de tu fu san ede den no ben man si en na ai.

Yosef ben kisi tu dren. Na ini ala den tu dren fu Yosef, en brada ben boigi gi en. Di Yosef ben fruteri en brada den dren disi, dan den no ben man si en na ai.

Wan dei now di Yosef bigi brada ben e luku den skapu fu den papa, dan Yakob e aksi Yosef fu go luku fa a e go nanga den. Di Yosef brada si a e kon, dan sonwan fu den e taki: ’Meki wi kiri en!’ Ma Ruben, a moro bigiwan e taki: ’Nôno, no du dati!’ Na presi fu dati den e grabu Yosef, trowe en go na ini wan peti di drei. Dan den e go sidon taki nanga makandra san fu du nanga en.

Na a yuruten dati, Ismaelsma e waka kon pasa. Yuda e taigi den afu-brada fu en: ’Meki wi seri en gi den man dati.’ Na so den e seri Yosef fu 20 solfru moni. Dati ben de wan takrudu srefisrefi!

San den brada sa fruteri den papa now? We, den e kiri wan krabita èn e dopu a moi dyakti fu Yosef wan tu leisi na ini a krabita brudu. Dan den e tyari a dyakti go na den papa. Den e taigi en: ’Luku san wi feni. A no a dyakti fu Yosef?’

Yakob e si taki na a dyakti fu Yosef. ’Wan ogri meti musu ben kiri Yosef’, a e bari krei. Na dati yoisti na san Yosef brada wani den papa bribi. Yakob de nanga bigi sari. A e krei furu dei langa. Ma Yosef no dede. Meki wi go luku pe den e tyari en go.