NENGE er wannomso ne á lu kunya kunya shi á lu zunguluu yô. Ngun ka Yosev je ne. Anngôôv nav sember teen un hen ior mban mba ve lu yemen ken Igipiti ne. Keera la Yosev una hingir kpan. Er nan anterev nav ve er imba kwaghbo ne nahana? Ka sha ci u ve kôr Yosev ihom.

Ter ve Yakob yange soo Yosev kpishi, kpishi je. Yange tese ishoon na sha u koron un gôgôriga u dedoo u lihen gban shin angahar. Er anngôôv nav mba 10 mbavesen mbara ve kav er Yosev a hembe doon Yakob ishima a ve cii yô, ve kôr un ihom je shi ve kera ôron kwagh a na bem bem ga. Kpa ityôkyaa i genegh yange i lu i i na u vea kôr un ihom yô.

Yange mnyam cier Yosev kwa har. Ken mnyam ma Yosev ma mhar mara cii anngôôv nav gure un inya. Er Yosev ôron anngôôv nav mnyam ma mhar mara yô, ihom ve sha a na i seer a seer.

Tsô iyange igen yô er anngôôv mba Yosev mba vesen ve lu nengen sha iyôngo i ter ve yô, Yakob kaa a Yosev er a za a̱ za nenge er ve lu yô. Er anngôôv mba Yosev ve nenge a na lu van ken ica je tsô, mbagenev ken a ve kaa er: ‘De se wua nen un!’ Kpa Ruben, u nomso u iunda la, kaa er: ‘Ei, de eren nen nahan ga!’ Tsô ve kôr Yosev ve gbihi shin ijôr i i̱ lu tseghe-tseghe mngerem lu shimi ga yô. Tsô ve tema ve gba henen kwagh u vea er a na yô.

Hen shighe ne ior mba Ishemael ve lu karen. Yuda man kaa a anngôôv nav er: ‘Sé tee nen un Mbaishemael ve̱ yam.’ Man ka kwagh u ve e̱r je la. Ve tee Yosev sha agbenger a azurfa 20. Yange ieren la i vihi shi i ban a mhôônom ma zungwen tsô!

Anngôôv nav mban vea ôr a ter ve er nyi? Ve wua ivo man ve tôô riga u doon nengen u Yosev la ve wa shin awambe a ivo la kwa kimbir kimbir. Tsô ve tôô riga la ve yem a mi hen ter ve Yakob ve za kaa er: ‘Se zua a ngun. Nenge dedoo, a̱ lu riga u wan wou Yosev shin a̱ lu un ga yô.’

Yakob kav er ka i̱. A vaa a kaa er: ‘Ka ma inyamikume je i woo Yosev ye.’ Man ka kwagh u anngôôv mba Yosev ve soo er ter ve a̱ hen vough je la. Ishima vihi Yakob ker kpishi, kpishi je. A vaa ayange imôngo. Kpa Yosev kpe ga. De se nenge kwagh u a er un ape i yem a na la.