AWONA mnyamata uyu, iyu wawoneka kuti we ndi chitima chikulu ukongwa. Mnyamata uyu ndi Yosefe. Aku ŵaki atimuguliska ku ŵanthu wo ajumpha kuluta ku Egipiti. Yiwu atimugula Yosefe kuti wakaje kapolu. Kumbi nchifukwa wuli aku ŵaki achita chinthu chiheni viyo? Nchifukwa chakuti yiwu atimuchitiya sanji Yosefe.

Awiskewu a Yakobe amuyanjanga ukongwa Yosefe. Yiwu angumwanja mwakuti angumusone mkhanju wakutowa ukongwa. Aku ŵaki 10 ŵati awona kuti Yakobe watimuyanja ukongwa Yosefe, angwamba kumuchitiya sanji ndipu angumutinkha. Kweniso penga chifukwa chinyaki cho yiwu amutinkhiyanga Yosefe.

Yosefe wangulota malotu ngaŵi. Ndipu m’malotu ngosi ngaŵi, wangulota kuti aku ŵaki atimugwadiya. Yosefe wati wakambiya aku ŵaki kuti ndivu wangulota, yiwu angumutinkha ukongwa kuphara pakwamba.

Zuŵa linyaki, aku ŵaki aku Yosefe anguluta kuchiliska mbereri za awiskewu, ndipu Yakobe wangutuma Yosefe kuti waluti kuchiŵawona ko ŵenga. Aku ŵaki ŵati amuwona, anyaki aku yiwu anguti: ‘Tiyeni timubayi.’ Kweni muku waki Rubene wangukamba kuti: ‘Awa, mungamubayanga cha.’ M’malu mwaki angumuko ndi kumuponya mu zenji lo lengavi maji. Sonu anguja pasi ndi kwamba kukambirana vo angachita nayu.

Panyengu iyi, Ayishumaele ajumphanga munthowa. Ndipu Yuda wangukambiya aku ŵaki kuti: ‘Tiyeni timuguliski ku Ayishumaele.’ Ivi ndivu anguchita nadi. Angumuguliska ndi ndalama za siliva zakukwana 20. Ŵanthu yaŵa anguchita chinthu chiheni ukongwa ndipuso angulongo kuti alivi lisungu.

Kumbi anguchikambanji kwa awiskewu? Yiwu angubaya mbuzi ndipu anguto mkhanju waku Yosefe, ndi kuwubizga mu ndopa za mbuzi. Ndipu pavuli paki anguto mkhanju wuwa ndi kuluta nawu kwa awiskewu a Yakobe ndipu anguŵakambiya kuti: ‘Tasaniya ichi. Achiwoneni chija nge ndi mkhanju waku Yosefe.’

Yakobe wati wawuziŵa wanguliya, ndipu wanguti: ‘Chinyama cha mudondu chitenere kuti ndichu chamubaya Yosefe.’ Ivi ndivu aku ŵaki aku Yosefe akhumbanga kuti awiskewu aŵanaŵani. Yakobe, wenga ndi chitima chikulu ukongwa. Iyu wangumuliya mwana waki kwa mazuŵa nganandi. Kweni Yosefe wenga weche wamoyu. Tiyi tiwoni cho chingumuchitikiya kweniko iyu wanguluta.