LANGA mbwauside ambwatyompedwe mwana musankwa ooyu. Ooyu ngu Josefa. Ibanyina bamuuzya kubasankwa aaba baunka ku Ijipiti. Okuya Josefa uya kuba muzike. Ino nkaambo nzi ibanyina ncobacitila cintu cibi cili boobu? Nkaambo kakuti balamufwida munyono Josefa.

Baswaabo ba Jakobo bakali kumuyanda kapati Josefa. Bakatondezya kuti balamuyanda kwiinda mukumusumina jansi libotu. Ibanyina bali 10 nibakabona Jakobo mbwaakali kumuyanda Josefa, bakatalika kumufwida munyono Josefa cakuti bakamusula. Pele kwakali akamwi kaambo kakapa kuti bamusule.

Josefa wakalota ziloto zyobilo. Muziloto zyoonse zyobilo banyina bakamufwugamina. Josefa naakabaambila ibanyina ziloto eezyi, bakaindilila kumusula.

Buzuba bumwi bapati bakwe nibakali kweembela mbelele zyaba swaabo, Jakobo wakatuma Josefa kuti akabone ibanyina mbobeembela. Ibanyina nibakamubona kaboola, bamwi bakati: ‘Atumujaye!’ Pele Lubeni mupati wabo wakati: ‘Peepe mutamujayi!’ Kuleka kuti bamuleke buyo, bakamujata Josefa akumuwaalila mucilindi cakayuminina meenda. Kumane boobo balibunga-bunga kutegwa babone ncobeelede kumucita.

Aciindi aawa kwakasika basankwa bana Isyimayeli. Juda wati kubanyina: ‘Atumuuzye kubana Isyimayeli.’ Eeco ncencico ncobakacita. Bamuuzya Josefa mali aansiliva aali 20. Elo kaka bakali bayumu moyo!

Ino ncinzi ibanyina ncobaya kubaambila baswaabo? Bajaya mpongo bamane babweza jansi lya Josefa litaliboteli balinyika-nyika mubulowa bwampongo. Kumane balitola jansi kumunzi kuli baswaabo ba Jakobo akubaambila kuti: ‘Eeci ncotwajana. Amulilange mubone naa talili jansi lya Josefa.’

Jakobo wabona kuti ndendilyo. Wakalila kayeeya kuti, ‘Josefa wakalumwa munyama.’ Oobu mbobali kuyanda ibanyina Josefa kuti baswaabo bayeeye mbubo. Jakobo wausa kapati. Walila kwamazuba manji. Pele Josefa tafwide. Atubone cakamucitikila ooko nkobakamutola.

Matalikilo 37:1-35.