¡KʼELA ja ala keremi jel aʼula sbʼaj sok jel tristeʼay! Yeʼn ja José. Ja smoj-alijel jumasaʼ wanto xchonowe yi ja winike it wajume bʼa Egipto. Ja bʼa chonabʼ jaw ti oj ajuk och mosoʼil ja José. ¿Jas yuj skʼulane yi ja jasunuk it mi lekuk ja yijtsʼineʼi? Yujni wa xyilkʼujolane.

Jacob, ja stat ja yeʼnle, jel skʼana juntiro ja José. Yuja wa syajtayi skʼulan yi jun tsamal spal kʼu. Yajni ja lajune smoj-alijel bʼankilal yilawe ja Jacob jel syajtay ja José, kʼe yilkʼujoluke. Pe chomajkil mi kechanuk ita yuj ja it, ayto pilan jasunuk yujila wa xyilkʼujolaneʼi.

José waychini chabʼ ekʼele. Ja bʼa chabʼ swayich jaw yila ja smoj-alijel jumasaʼ wa xkoʼye mekʼan sbʼaj. Yajni ja José xcholo yabʼ ja swayich ja smoj-alijeliki, ja yilkʼujolajel yiʼojeʼi ipaxi ele.

Jun kʼakʼu yajni ja smoj-alijel jumasaʼ ja José wane stalnajel ja xchej ja stati, ja Jacob yala yabʼ ja José awajuk sok bʼa oj waj yil jastal wan ekʼel yujile. Yajni ja sbʼankil jumasaʼ ja José yilawe ti jakum jana, jujuntik bʼa yeʼnle kʼe yal-e: «¡La jmiltikik!». Pe ja maʼ bʼankilal yujileʼi, ja Rubén, yala: «¡Miyuk, moka kʼulukex ja jaw!». Ja yuj mi skʼulane ja jaw, ti sjipawe koʼ bʼa jun takin poso. Anto ti ochye kulana bʼa oj xchap-e jas oj skʼuluke yi ja yijtsʼineʼi.

Yajni wan ekʼel ja it tyempoxta ti jakume jan jujuntik winik chona jastik junuk. Anto ja Judá ti yala yabʼ ja tuk smoj-alijeli: «La jchontik yi ja winike chonwanume jaw». Jachʼni skʼulaneʼa. Xchonowe ja José yuj 20 sat plata. ¡Jelxa kistal ja jas skʼulaneʼi!

¿Jas maʼ oj kʼot yal-e yabʼ ja stateʼi? Smilawe jun chibo sok ja xchikʼel ja chibo ti suluwe jitsan ekʼele ja tsamal spal kʼu ja José. Anto tixa yiʼawe och yi ja Jacob ja spal kʼu ja José sok ti yalawe yabʼa: «Jtaʼatikon ja it, kʼela sok ila ta mi jaʼuk sbʼaj ja José».

Jacob snaʼani yeʼn sbʼaj ja José ja pal kʼuʼi, ti yalaʼa: «¡Juni kʼakʼal chante milji yuj ja José!». Jani jaw ja jas wa skʼanawe ja smoj-alijel jumasaʼ ja José oj spensaraʼuk ja stateʼi. Ja Jacob jel och stristeʼil. Yokʼeltay jitsan kʼakʼu. Pe ja José mini chameluka. La kiltik jasa oj ekʼ sbʼaj ja bʼa Egipto.