КӨРЕМ, бо аныяк оолдуң муңгаргай болгаш идегелин шуут ышкынган деп чүвезин. Ол дээрге Ио́сиф-тир. Ооң акылары ам чаа ону Еги́петче угланып бар чыдар кижилерге садыпкан. Аңаа Ио́сиф кул болур. Ооң чаңгыс адалыг алышкылары чүге ону ындыг багай аажылааныл? Чүге дээрге олар Ио́сифке адааргап турар.

Ио́сифтиң ачазы Иа́ков аңаа хөлчок ынак турган. Ол Ио́сифке эки хамаарылгазын көргүзер дээш, аңаа узун чараш хеп даарап берген. Иа́ков Ио́сифке кайы-хире күштүг ынаан көргеш, ооң 10 акызы Ио́сифке адааргааш, ону көрбестей берген. Ынчалза-даа ону көрбестээр өске чылдагаан база турган.

Ио́сиф ийи дүш көрген. Оларның ийилдирзинде акылары аңаа мөгейип турганнар. Кажан Ио́сиф оларга ол дүштерни чугаалап бээрге, олар ону баштайгызындан артык көөр хөңнү чок апарган.

Бир-ле катап, Ио́сифтиң улуг акылары адазының хойларын кадарып турда, Иа́ков Ио́сифти акыларынга ужурашкаш, келирин дилээн. Кажан Ио́сифтиң чоруп орарын көрүп кааш, ооң акыларының чамдыызы сүмелээн: ‘Ону өлүрүп кааптар-дыр, че!’ — ‘Чок, ындыг чүве кылбаңар!’ — деп, оларның эң улуу Руви́м дилээн. Ынчан олар Ио́сифтиң хевин уштуп аппаргаш, ону суг чок улуг оңгарже киир октапкан. Ооң соонда, ооң-биле улаштыр чүнү кылырын шиитпирлээр дээш, олар олурупканнар.

Ол үеде оларның чанындан Измаил чурттуг улустар эртип бар чыткан. Иу́да бодунуң алышкыларынга сүмелээн: ‘Ио́сифти измаильчилерге садыптаалыңарам’. Олар ынчаар кылган. Олар Ио́сифти 20 мөңгүн көпеекке садыпканнар. Ол чорук кайы-хире кара-сагыштыг болгаш кээргээр сеткил чок-тур!

Ынчалза-даа алышкылар адазынга чүү дээр? Олар өшкүнү өлүргеш, Ио́сифтиң чараш хевин өшкү ханынга суп, борапканнар. Ооң соонда олар ачазы Иа́ковка хепти эккелгеш: ‘Бистиң тыпкан чүвевис бо-дур. Ио́сифтиң хеви эвес-тир бе, көрем’,— дигеннер.

Иа́ков көөрге — шынап-ла, ооң хеви-дир. ‘Ио́сифти араатан аң өлүрген боор оң’— деп, ол ыглап турар. Ынчап кээрге, акыларының бодап алган чүүлү бүде берген. Иа́ков аажок муңгараан. Дыка хөй хүннер дургузунда ол ыглап келген. Ынчалза-даа Ио́сиф өлбээн. Туттуруушкунга ооң-биле чүү болуп турарын, билип алыылам.