AMLOLE mcandaju, ali jwacanasa, soni jwangali cembeceyo. Jwalakweju ali Yusufu. Acakulugwe agambile kumsumisya kwene kwa ŵanduŵa, ŵali paulendo wakwawula ku Eguputo. Kweleko Yusufu cakaŵe kapolo. Ana ligongo cici acakulugwe atesile cindu cakusakalaci? Lili ligongo lyakuti akumtendela jelasi Yusufu.

Atati ŵawo Yakobo ŵamnonyelaga mnope Yusufu. Ŵalosisye kuti ŵamnonyelaga mnope mwakumpanganyicisya mkanjo wakusalala mnope. Acakulugwe 10 ŵala paŵayiweni kuti Yakobo akumnonyela mnope Yusufu, ŵatandite kutenda jelasi soni kum’ŵenga. Papalisoni ligongo line lyaŵam’ŵenjelaga.

Yusufu ŵasagamile sagamisi siŵili. Mu sagamisi syosope syaŵasagamilesyo acakulugwe Yusufu ŵamtindiŵalilaga. Yusufu paŵagambile kwasalila sagamisisyo acabale ŵakwe ŵala, ŵajendelecele kum’ŵenga mnope.

Sambano lisiku line acakulugwe ŵalisyaga ngondolo sya atati ŵawo, m’yoyo Yakobo ŵam’ŵendile Yusufu kuti ajawule kukulola naga yindu yajendelaga cenene acakulugwewo. Paŵam’weni Yusufu ali mkwisa, ŵane ŵatite: ‘Kwende tum’wulaje!’ Nambo Lubeni jwamkulungwa mwa acakulugwewo, ŵatite: ‘Iyayi, akatenda yeleyo!’ Mmalo mwakwe ŵamkamwile nikumponya mu cisima cangali mesi. Kaneko ŵatemi pasi kuti aganicisye yacamtende.

Pakatema keleka ŵayice Ayisimayeli. Yuda ŵaŵecete kwa acakulugwe ŵala kuti: ‘Kwende tumsumisye kwa Ayisimayeli.’ Ni ŵatesile yeleyo. Ŵamsumisye Yusufu ni mbiya 20 sya silifa. Syelesi syaliji ngalwe, soni ungali canasa!

Ana sambano acakulugwewo akajile kusala cici kwa baba ŵawo? Ŵawuleje mbusi ni kuwuloŵeka mkanjo wakusalala wula mwakuwilisyawilisya m’miyasi ja mbusi jila. Ni kaneko ŵawujigalile mkanjo wula kunyumba kwa baba ŵawo ni ŵatite: ‘Twacisimene aci. Alole naga nganiwuŵa mkanjo wa Yusufu.’

Yakobo akuwuwona kuti uli kwene mkanjo wa Yusufu. Jwalakwe akulila kuti: ‘cilombo komboleka kuti cim’wuleje Yusufu.’ Acakulugwe Yusufu ŵala akusaka kuti baba ŵawo aganisyeje yeleyo. Yakobo ali jwacanasa mnope. Jwalakwe akulila kwa masiku gejinji. Nambo Yusufu nganawa. Kwende tulole yayikumtendecela kwamjigalile kula.