YOSEF ye jeha 17 pɛ nɛ a ngɔ lɛ kɛ ho Mizraim ya. A ya jua lɛ kɛ ha nyumu ko nɛ a tsɛɛ lɛ Potifar. Potifar tsuɔ ní ha Mizraim matsɛ nɛ́ e biɛ ji Farao ɔ.

Yosef tsuɔ ní wawɛɛ ha e nyɔmtsɛ Potifar. Enɛ ɔ heje benɛ Yosef ba wa a, Potifar ngɔ lɛ kɛ to e we ɔ tsuo nya. Lɛɛ, kɛ ba kɛɛ nɛ a wo Yosef tsu mɔ? Potifar yo ɔ nɛ e ha e ba ja.

Yosef wa kɛ su nyumu mi kɛ e he fɛu. Enɛ ɔ ha Potifar yo ɔ ba ná e he suɔmi kaa e kɛ lɛ maa hwɔ si. Se Yosef le kaa e ji tɔmi kaa e maa pee ja, heje ɔ, e kua. Enɛ ɔ ha Potifar yo ɔ mi mi fu lɛ. Lɔɔ heje benɛ e huno ɔ ba we mi ɔ, e ye lakpa ha lɛ ke: ‘Jamɛ a Yosef, nɔmlɔ yayami ɔ ba ná mi pani nya kaa e kɛ mi maa hwɔ si!’ Potifar he nɔ́ nɛ e yo ɔ de lɛ ɔ ye, nɛ e ha a wo Yosef tsu.

E kɛ we nɛ tsu nɔ hyɛlɔ ɔ na kaa nɔmlɔ kpakpa ji Yosef. Lɔɔ he ɔ, e to ni kpahi tsuo nɛ a wo mɛ tsu ɔ ngɔ wo Yosef dɛ mi. Pee se ɔ, Farao mi mi ba fu e da nɔ hyɛlɔ kɛ abolo salɔ ɔ, nɛ e wo mɛ tsu. Ligbi ko nyɔ mi ɔ, mɛ ni enyɔ ɔmɛ tsuo a nla, se a nui a nlami ɔmɛ a sisi. E nɔ jena a, Yosef de mɛ ke: ‘Nyɛ sɛɛ nyɛ nlami ɔmɛ kɛ ha mi.’ Nɛ benɛ a de lɛ ɔ, Mawu ye bua Yosef nɛ e tsɔɔ mɛ nlami ɔmɛ a sisi.

Yosef de da nɔ nyɛlɔ ɔ ke: ‘Ngɛ ligbi etɛ mi ɔ, a ma je mo kɛ je tsu ɔ mi, nɛ o ma ya sɔmɔ Farao kaa e da nɔ hyɛlɔ ekohu. Ke o je kpo ɔ, tu ye he munyu kɛ ha Farao, konɛ o ye bua mi nɛ ma je hiɛ ɔ.’ Se abolo salɔ ɔ lɛɛ Yosef de lɛ ke: ‘Ngɛ ligbi etɛ mi ɔ, Farao ma ha nɛ́ a po o yi.’

Ligbi etɛ mi ɔ, nɔ́ nɛ Yosef de ɔ ba mi pɛpɛɛpɛ. Farao ha nɛ a po abolo salɔ ɔ yi. Se da nɔ hyɛlɔ ɔ lɛɛ, a je lɛ ngɛ tsu ɔ mi nɛ e ya bɔni matsɛ ɔ sɔmɔmi ekohu. Se da nɔ hyɛlɔ ɔ hɛ je Yosef nɔ pɛsɛpɛsɛ! Nɛ e de we Farao nɔ́ ko kulaa ngɛ Yosef he. Lɔɔ he ɔ, Yosef ya nɔ nɛ e hi tsu ɔ mi.