I NUN mɔɔ bé fá Zozɛfu kɔ́ Ezipti lɔ’n, nn ɔ le afuɛ blu nin nso (17) cɛ. Lɔ’n, be yoli i atɛ bian kun sa nun. Be flɛ i kɛ Potifali. Ɔ di junman Ezipti Famiɛn mɔ be flɛ i kɛ Faraɔn’n i sa nun.

Zozɛfu di junman klanman kpa man i min Potifali. Ɔ maan kɛ Zozɛfu yoli kpɛnngbɛn’n, Potifali fɛli i awlo’n nin i nun ninnge kwlaa wlɛli i sa nun kɛ ɔ nian be su. ?Sanngɛ ngue ti yɛ be wlɛ i bisua wa ɔ? Potifali i yi’n ti ɔ.

Zozɛfu ɲinnin klanman, i bɔbɔ’n ti klanman, ɔ maan Potifali i yi’n waan Zozɛfu nin i be la. Sanngɛ Zozɛfu si kɛ i sɔ’n ti tɛ, ɔ maan w’a kplinman su.

Potifali i yi’n fali ya dan kpa. Kpɛkun kɛ i wun’n juli awlo lɛ’n, ɔ buali ato kleli i kɛ: ‘Zozɛfu kanga nga kunndɛli kɛ ɔ nin min lá.’ Potifali fali i yi’n i ndɛ’n su, ɔ maan ɔ fali Zozɛfu i wun ya kekle kpa. I sɔ ti’n, ɔ wlɛli i bisua. Kɛ i osu cɛli kan’n, bisua su kpɛn’n wunnin kɛ Zozɛfu ti sran kpa. I ti ɔ fɛli i sieli bisuafuɛ’m be kwlaa be sunianfuɛ. I sin’n Faraɔn fali nzan sufuɛ’n nin i kpaun tɔnfuɛ’n be wun ya, kpɛkun yɛ ɔ wlali be bisua ɔ. Le kun kɔnguɛ be nɲɔn sɔ’n be cɛnnin laliɛ, sanngɛ be siman be laliɛ’m be bo. Kɛ aliɛ cɛnnin’n, Zozɛfu seli kɛ: ‘Amun kan amun laliɛ mun kle min maan n nian e.’ Yɛ kɛ be kannin’n, Ɲanmiɛn wawɛ’n ukali Zozɛfu maan ɔ tutuli be laliɛ nga be cɛnnin’n be bo.

Nzan sufuɛ’n i liɛ’n, Zozɛfu seli kɛ: ‘Ɔ ka cɛn nsan, á fín bisua nun fíte, kpɛkun á yó Faraɔn i nzan sufuɛ ekun.’ Zozɛfu kɛn i ekun kɛ: ‘Cɛn nga be yi wɔ’n, kan min ndɛ kle Faraɔn yɛ uka min maan n fin lika nga nun n fite.’ Sanngɛ kpaun tɔnfuɛ’n liɛ, Zozɛfu seli kɛ: ‘Ɔ ka cɛn nsan Faraɔn wá kpɛ́ ɔ ti’n.’

I le nsan su’n, ndɛ nga Zozɛfu kannin’n kpɛnnin su. Faraɔn kpɛli kpaun tɔnfuɛ’n i ti’n. Ɔ yili nzan sufuɛ’n i bisua’n nun fiteli, yɛ ɔ suli nzan’n mannin famiɛn’n ekun ɔn. Sanngɛ nzan sufuɛ’n i wla fili Zozɛfu su! W’a kanman i wun ndɛ fi w’a kleman Faraɔn, ɔ maan Zozɛfu kali bisua nun lɔ.