Maana 22nan

Yusufu bilara kaso la

YUSUFU si tun ye san 17 dɔrɔn de ye, tuma min na u taara ni a ye Misira. Yen nɔ, u y’a feere cɛ dɔ ma, min tɔgɔ ye ko Potifar. Potifar tun bɛ baara kɛ Faraon de ye, n’o tun ye Misira masakɛ ye.

Yusufu tun bɛ baaraba de kɛ a makɛ Potifar ye. O kosɔn, a kɔrɔbayara tuma min na, Potifar y’a bila a ka so bɛɛ kunna. Nka, mun na Yusufu dun bɛ kaso la? Potifar muso de y’a kɛ Yusufu bɛ kaso la.

Yusufu kɔrɔbayara ka kɛ cɛ ɲumanba ye. Potifar muso tun b’a fɛ Yusufu ka da a fɛ. Nka, Yusufu b’a dɔn ko o ye kojuguba de ye. O kosɔn, a ma sɔn ka da Potifar muso fɛ. O ye Potifar muso ladimin kosɛbɛ. A cɛ nana tuma min na, a ye nkalon tigɛ, k’a fɔ ko: ‘Yusufu y’a ɲini ka da ne fɛ.’ Potifar dara a muso ka kuma la. A diminna kosɛbɛ Yusufu kɔrɔ, ka a bila kaso la.

Cɛ min tun bɛ kasobon kunna, o y’a ye ko Yusufu ye mɔgɔ ɲuman ye. O la sa, a ye Yusufu bila kasoden tɔw bɛɛ kunna. Kɔfɛ, Faraon diminna a ka minnifɛndibaga kuntigi ni a ka nburugosila kuntigi kɔrɔ, k’u fila bila kaso la. Don dɔ su fɛ, u kelen-kelen bɛɛ ye sugo kɛrɛnkɛrɛnnen dɔ kɛ. Nka u fila si tun tɛ u ka sugo kɔrɔ dɔn. O dugujɛ, Yusufu y’a fɔ u ye ko: ‘Aw ka aw ka sugu lakali ne ye.’ U ye o lakali tuma min na, Yusufu sera ka u ka sugo kɔrɔ fɔ u ye, Ala barika la.

Yusufu y’a fɔ Faraon ka minnifɛndibaga kuntigi ye ko: ‘Yanni tile saba cɛ, i bɛna bɔ kaso la, ka segin minnifɛn dili la Faraon ma.’ O kosɔn Yusufu y’a fɔ a ye ka fara o kan, ko: ‘N’i bɔra yan tuma min na, i ka ne ka kuma fɔ Faraon ye, ka ne dɛmɛ ka bɔ yan yɔrɔ la.’ Nka, Yusufu y’a fɔ Faraon ka nburugosila kuntigi ye ko: ‘Yanni tile saba dɔrɔn cɛ, Faraon na i kunkolo tigɛ ka bɔ i la.’

Tile saba selen, kow kɛra i ko Yusufu y’a fɔ cogo min na. Faraon ye nburugosila kuntigi kunkolo tigɛ ka bɔ a la. Minnifɛndibaga kuntigi bɔra kaso la, ka baara kɛ masakɛ ye kokura. Nka, Faraon ka minnifɛndibaga kuntigi hakili bɔra Yusufu kɔ pewu. A ma Yusufu ko fɔ Faraon ye. Yusufu tora o cogo la kaso la.

Jenɛse 39:​1-23; 40:​1-23.