KOLA traqa kowe la 17 lao macatre i Iosefa, ngöne lo ijine kola xomi angeic a tro Aigupito. Ame la angeic a traqa ngöne la nöj, hna salemë angeic koi Potifara, ketre taan la hna nyijoxu i Farao, joxu ne Aigupito.

Ka nyihlue nyipici Iosefa koi Potifara. Ame hë la angeic a nyipi atr, hnei Potifara hna acili angeic troa musinën la hnalapa i nyidrë. Ngo pine nemene kö matre akalabusi Iosefa jë? Hna inyi zö menu hnene lo föe i Potifara.

Ketre thupëtresiji ka tru hë Iosefa nge ka mingöming pena, ene pe föi Potifara pala hi a unaiele angeic, troa ce meköl me eahlo. Ngo hnei Iosefa hna canga thipetrij, pine laka, atre hnyawa hi angeic ka hape ngazo lai. Tru la elëhni ne la föi Potifara. Matre ame la kola traqa hnei trahmany, eahlo a thoi ju me hape: ‘Ngazo catr la thiina i Iosefa, hnei angeic hna thel troa ce meköl me eni!’ Mejiune ju hi Potifara kowe la ithanata ne la föi nyidrë, nge ame koi nyidrë, tre, ceitui Iosefa ha enehila me ketre ewekë ka sis. Celë hi kepin matre hna akalabusi angeic.

Thaa hmiitre kö nge kola öhn hnene la ka thupë kalabus, laka, ka nyipi atre catr Iosefa. Haawe, nyidrëti a acili angeice ju troa thupën la itre hna akalabusin asë. Ame ngöne la ketre ijin, hnei Farao hna elëhni kowe la tane i angetre kepe trepe ime i nyidrë me tane i angetre kuci xen, me umë nyidro hnin la kalabus. Ame ngöne la ketre jidr, hnei nyidroti hna isa pu, nge thatre kö nyidroti la sipu alien la lue pu i nyidro. Ame hë ngöne la drai elany, kola qaja hnei Iosefa ka hape: ‘Qaja jë koi ni la itre pu i epon.’ Nyidroti a qaja jë la lue pu i nyidro, nge jën la ixatua i Akötresie, Iosefa a hamën koi nyidro la alien lue ej.

Hanawang la hna qaja hnei Iosefa kowe la tane i angetre kepe trepe ime i Farao, kola hape: ‘Thupene köni drai, tro Farao a nue eö qa hnin la kalabus, nge tro eö a kuca hmaca lo huliwa i eö ekö.’ Kola qaja mina fe hnei Iosefa koi angeic ka hape: ‘Ame hë la eö a lö qaa celë hnine kalabus, mekune kö eö qeje ni koi Farao, nge kuca jë matre tro fe ni a hane lö pi qaa celë hnine kalabus.’ Ngo ame pë hë kowe la tane i angetre kuci xen, öni Iosefa koi angeic ka hape: ‘Ame ngöne la köni drai, tro Farao a iupi troa thupa la he i eö.’

Ame hi la kola fenesi la hnaakönine drai, kolo hi a eatr tune lo hna qaja hnei Iosefa. Farao a iupi troa thupa la he ne la tane i angetre kuci xen. Ame pë hë lo tane i angetre kepe trepe ime i joxu, tre, hna thepe angeic qa hnin la kalabus, nge hna hamën hmaca lo hnëqa i angeic. Thaa meku Iosefa hë hnei angeic! Thaa hnei angeice kö hna qeje Iosefa koi Farao, matre thaa feke kö Iosefa qa hnin la kalabus.