YOSEF eye afii 17 pɛ be mli ni akɛ lɛ tee Mizraim lɛ. Ahɔ̃ɔ lɛ yɛ jɛmɛ aha nuu ko ni atsɛɔ lɛ Potifar. Potifar tsuɔ nii ehaa Mizraim maŋtsɛ ni atsɛɔ lɛ Farao lɛ.

Yosef tsu nii waa eha enuŋtsɔ Potifar. No hewɔ lɛ beni Yosef da lɛ, Potifar fee lɛ eshia lɛ fɛɛ nɔ onukpa. Belɛ, mɛni hewɔ awo Yosef tsuŋ yɛ biɛ mɔ? Ejɛ Potifar ŋa lɛ.

Yosef da ni ebatsɔ nuu ni he yɔɔ fɛo, ni Potifar ŋa lɛ miisumɔ ni ekɛ lɛ awɔ. Shi Yosef le akɛ eji efɔŋ, no hewɔ lɛ efeee nakai. Potifar ŋa lɛ mli fu waa. No hewɔ lɛ beni ewu lɛ ba shia lɛ, emale etsɔɔ lɛ ni ekɛɛ lɛ akɛ: ‘Nakai Yosef gbɔmɔ fɔŋ lɛ bɔ mɔdɛŋ ni ekɛ mi awɔ!’ Potifar hé nɔ ni eŋa lɛ kɛɔ lɛ eye, ni emli fu Yosef waa. No hewɔ lɛ eha ayawo lɛ tsuŋ.

Etsɛɛɛ ni mɔ ni kwɛɔ mɛi ni awo amɛ tsuŋ lɛ anɔ lɛ na akɛ Yosef ji gbɔmɔ kpakpa. No hewɔ lɛ eha ekwɛ mɛi ni awo amɛ tsuŋ lɛ fɛɛ nɔ. Yɛ sɛɛ mli lɛ Farao mli fu edãawolɔ lɛ kɛ ebolooshãlɔ lɛ, ni eha awo amɛ tsuŋ. Gbi ko gbɛkɛ lɛ amɛteŋ mɔ fɛɛ mɔ la lamɔi pɔtɛɛ komɛi, shi amɛnuuu amɛ lamɔi lɛ ashishi. Beni je tsɛre lɛ, Yosef kɛɛ amɛ akɛ: ‘Nyɛgbaa mi nyɛ lamɔi lɛ.’ Ni beni amɛfee nakai lɛ, Nyɔŋmɔ ye ebua Yosef ni etsɔɔ amɛ amɛlamɔi lɛ ashishi.

Yosef kɛɛ dãawolɔ lɛ akɛ: ‘Eshwɛ gbii etɛ ni abaaŋmɛɛ ohe kɛjɛ tsuŋwoohe nɛɛ, ni obaatsɔ Farao dãawolɔ ekoŋŋ.’ No hewɔ lɛ Yosef kɛfata he akɛ: ‘Kɛ oje kpo lɛ, gbaa mihe sane otsɔɔ Farao, ni oye obua mi ni ajie mi kɛjɛ biɛ.’ Shi Yosef kɛɛ abolooshãlɔ lɛ akɛ: ‘Eshwɛ gbii etɛ ni Farao baaha afo oyitso.’

Yɛ gbii etɛ mli lɛ, eba mli pɛpɛɛpɛ, taakɛ Yosef wie lɛ. Farao ha afo abolooshãlɔ lɛ yitso. Ni ajie dãawolɔ lɛ kɛjɛ tsũ lɛŋ ni ebɔi maŋtsɛ lɛ sɔɔmɔ ekoŋŋ. Shi dãawolɔ lɛ hiɛ kpa Yosef nɔ kwraa! Ewieee ehe etsɔɔɔ Farao, ni eha Yosef hi tsuŋwoohe lɛ.