JOSÉ oguereko 17 áñonte ojeguerahárõ guare Egíptope. Upépe oñevende peteĩ karai hérava Potifárpe. Potifar ombaʼapo pe rréi Egiptopeguápe g̃uarã, oñehenóiva Faraón.

José ombaʼapo mbarete ijára Potifárpe g̃uarã. Upévare, José ikariaʼypa rire, Potifar omeʼẽ chupe oñangareko hag̃ua opa mbaʼe oguerekóvare. Upéicharõ, mbaʼére piko José oĩ kárselpe? Potifar rembireko ojapovaʼekuére.

José okakuaapa rire oiko chugui peteĩ kariaʼy neporãva, ha Potifar rembireko oñenose hendive. Péro José oikuaa upéva ivaiha, ha ndojaposéi. Potifar rembireko ipochyeterei. Upévare, ou rire iména, ijapu chupe ha heʼi: ‘Pe José tieʼỹ oñenosemoʼã chendive!’. Potifar oguerovia hembirekópe, ha ipochyeterei José ndive. Upévare oguerahauka chupe kárselpe.

Pe kársel rehe oñangarekóva pyaʼe ohechakuaa José haʼeha peteĩ kuimbaʼe ivuénova. Upévare omoĩmba José poguýpe umi presokuéra. Upe rire Faraón ipochy ikopéro ha ipanadéro ndive, ha omoinge chupekuéra kárselpe. Peteĩ pyhare, mokõivéva oguereko peteĩ suéño espesiál, péro haʼekuéra ndoikuaái mbaʼépa heʼise. Upe koʼẽme José heʼi chupekuéra: ‘Pemombeʼu chéve umi suéño peguerekovaʼekue’. Upe rire José, oipytyvõgui chupe Ñandejára, omombeʼu chupekuéra mbaʼépa heʼise umi suéño oguerekovaʼekue.

Pe kopérope heʼi José: ‘Tres día haguépe resẽta kárselgui, ha reservi jeýta Faraónpe’. Upévare José heʼi avei chupe: ‘Resẽ vove, nemanduʼákena cherehe Faraónpe, ha chepytyvõ asẽ hag̃ua koʼágui’. Péro pe panadérope José heʼi: ‘Tres día haguépe Faraón neakãʼóta’.

Tres día haguépe oiko José heʼihagueichaite. Faraón oñakãʼo pe panadérope. Ha pe kopérope katu oñeguenohẽ kárselgui ha oservi jey Faraónpe. Péro hesarái Joségui! Naimanduʼái hese Faraónpe, ha José opyta jey kárselpe.