LAJ Jose wank 17 chihabʼ re naq kikʼameʼk Egipto. Saʼ li tenamit aʼin laj Potifar kiloqʼok re laj Jose. Laj Potifar aʼan xmoos laj Faraon, li awabʼej re Egipto.

Laj Jose kikʼanjelak chi kaw saʼ rochoch laj Potifar. Naq kiwinqiloʼk laj Jose, laj Potifar kixkanabʼ saʼ ruqʼ chixjunil li wank saʼ rochoch. Abʼan, kʼaʼut wank saʼ tzʼalam laj Jose? Saʼ xmaak li rixaqil laj Potifar.

Laj Jose chʼinaʼus naʼilok. Joʼkan naq li rixaqil laj Potifar kiraj naq laj Jose tyoklaaq rikʼin. Laj Jose inkʼaʼ kiraj xbʼaan naq naxnaw naq nimla maak xbʼaanunkil aʼin. Joʼkan naq kichalk xjosqʼil li rixaqil laj Potifar. Li ixq kixye re li xbʼeelom: ‹Maaʼus xnaʼlebʼ laj Jose, kiraj inmuxbʼal!› Laj Potifar kixpaabʼ re li rixaqil. Joʼkan naq kichalk xjosqʼil ut kixkʼe saʼ tzʼalam laj Jose.

Laj kʼaakʼalenel tzʼalam kixkʼe reetal naq laj Jose chaabʼil xnaʼlebʼ. Joʼkan naq kixkanabʼ saʼ ruqʼ laj Jose chixjunilebʼ li wankebʼ saʼ tzʼalam. Moqon chik laj Faraon kixkʼe saʼ tzʼalam laj kʼehol ukʼaʼ ut laj yiibʼanel kaxlan wa. Saʼ jun qʼoqyink, ebʼ li wiibʼ chi winq aʼin keʼmatkʼek, abʼan inkʼaʼ keʼxnaw xyaalal ebʼ li xmatkʼ. Naq kisaqewk laj Jose kixye rehebʼ: ‹Seeraqʼimaq we leematkʼ›. Li Yos kitenqʼank re laj Jose chi xnawbʼal xyaalal ebʼ li matkʼ.

Laj Jose kixye re laj kʼehol ukʼaʼ: ‹Saʼ oxibʼ kutan tat-elq saʼ tzʼalam ut tat-oq wiʼ chik chi kʼanjelak chiru laj Faraon›. Kixye ajwiʼ re: ‹Chat-aatinaq chiwix rikʼin laj Faraon re naq tinrisi saʼ tzʼalam›. Re laj yiibʼanel kaxlan wa kixye: ‹Saʼ oxibʼ kutan laj Faraon tatxkamsi›.

Naq kiwulak li oxibʼ kutan keʼxkʼul tzʼaqal joʼ kixye laj Jose. Laj Faraon kixkamsi laj yiibʼanel kaxlan wa. Ut kirisi saʼ tzʼalam laj kʼehol ukʼaʼ ut kiʼok wiʼ chik chi kʼanjelak chiru li awabʼej. Abʼan, laj kʼehol ukʼaʼ kisach saʼ xchʼool aatinak chirix laj Jose rikʼin laj Faraon, joʼkan naq laj Jose toj kikanaak saʼ tzʼalam.