YOSEFWA wajingatu na myaka ya kusemwa 17 kimye kyo bamutwajile ku Ijipita. Kuno ku Ijipita bamupoteshe ku muntu wa jizhina ja Potifwalo. Potifwalo waingilanga kwi mfumu wa Ijipita aye Felo.

Yosefwa wamwingijilanga bingi na ngovu nkambo yanji Potifwalo. Byonkabyo Yosefwa byo akomene, Potifwalo wamupele bukulumpe bwa pa nzubo yanji yonse. Pano mambo ka Yosefwa o bamutayijile mu kaleya? Walengejile ke yenka muka Potifwalo.

Yosefwa wajinga na mubiji walamba wamwekelenga bulongo, kabiji ne muka Potifwalo wakebelenga’mba alaale nanji. Bino Yosefwa wayukile kuba’mba kino kintu kyatama, kabiji kechi wikyubile ne. Muka Potifwalo wazhingijile bingi. Onkao mambo, mwatawanji byo abwelele ku nzubo, wamubepele ne kwamba’mba: ‘Awa Yosefwa mubi waji kukebanga kulaala ne amiwa!’ Potifwalo waumvwijile byaambile mukazhanji kabiji wamuzhingijile bingi Yosefwa. Onkao mambo wakambizhe kumutaya mu kaleya.

Kalama wa kaleya waishile kumona’mba Yosefwa wajinga muntu wawama. Byonkabyo wamupele lūsa lwa pa bakaili bonse bajinga mu kaleya. Palutwe kacheche, Felo wamuzhingijile bingi kaseya ne kuki ne kwibataya bonse mu kaleya. Bufuku bumo bonse babiji balotele biloto, bino kechi bayukile mo byatajile ne. Juba jalondejilepo Yosefwa wibambile’mba: ‘Mbulai biloto byenu.’ Byo bamubujile, Yosefwa, na bukwasho bwa Lesa, walumbulwile mwatajile biloto byabo.

Ku yewa kaseya, Yosefwa waambile’mba: ‘Pa moba asatu bakemufumya mu kaleya kabiji ne kutwajijila kwikala jikwabo kaseya wa kwa Felo.’ Yosefwa wanungilepo amba: ‘Inge mwafuma, mukañambileko kwi Felo ne kunkwasha kufumamo muno mu kaleya.’ Bino Yosefwa waambijile kuuki amba: ‘Pa moba asatu Felo ukemuchibako mutwe.’

Pa moba asatu kyaubiwe monka mwaambijile Yosefwa. Felo wamuchibileko mutwe awa kuki. Bino kaseya bamufumishe mu kaleya ne kubwela na kutendeka kwingijila jikwabo mfumu. Bino awa kaseya kechi wamuvulukilepo Yosefwa ne! Kechi wamubujile Felo pa mambo a Yosefwa ne, kabiji Yosefwa watwajijile kwikala monka mu kaleya.