JOSƐF bin ol 17 ia we dɛn go wit am na Ijipt. Dɛn sɛl am to wan man we nem Pɔtifa. Pɔtifa bin de wɔk fɔ di kiŋ na Ijipt we dɛn kɔl Fɛro.

Josɛf bin de wok tranga wan fɔ in masta. So we i big smɔl, Pɔtifa put am oba ɔlman na in os. Bɔt wetin mek Josɛf de naw na jel? Na Pɔtifa in wɛf mek i de na jel.

Josɛf na fayn yɔŋ man, so Pɔtifa in wɛf bin want mek i ledɔm wit am. Bɔt Josɛf no se i nɔ fayn fɔ du dat, ɛn i nɔ du am. Pɔtifa in wɛf vɛks bad bad wan. So we in man kam na os, i lay to am se: ‘Josɛf bad, i tray fɔ ledɔm wit mi!’ Pɔtifa biliv wetin in wɛf se, ɛn i vɛks pan Josɛf bad bad wan. So i mek dɛn put Josɛf na jel.

I nɔ tu te, di man we de oba di jelman dɛn si se Josɛf na gud man. So i put am oba ɔl di ɔda jelman dɛn. Leta, Fɛro vɛks pan di man we de gi am tin fɔ drink ɛn pan in bekaman. So i put dɛn ɔl tu na jel. Wan nɛt, dɛn tu man ya drim spɛshal drim dɛn. Bɔt dɛn nɔ no wetin dɛn drim ya min. Di ɔda de, Josɛf tɛl dɛn se: ‘Una tɛl mi wetin una drim.’ Ɛn we dɛn tɛl Josɛf, Gɔd ɛp am fɔ tɛl dɛn wetin dɛn drim dɛn min.

Josɛf tɛl di man we bin de gi di kiŋ tin fɔ drink se: ‘Afta tri dez, dɛn go pul yu na jel, ɛn yu go bigin gi Fɛro tin fɔ drink bak.’ Josɛf tɛl am bak se: ‘We dɛn pul yu na jel, duya tɛl Fɛro bɔt mi, ɛp mi mek a kɔmɔt na jel.’ Bɔt Josɛf tɛl di bekaman se: ‘Afta tri dez, Fɛro go mek dɛn kɔt yu ed.’

We di tri de rich, ɔl dɛn tin ya apin jɔs lɛk aw Josɛf bin se. Fɛro mek dɛn kɔt di bekaman in ed. Di wan we de gi di kiŋ tin fɔ drink bin kɔmɔt na jel ɛn bigin wok fɔ di kiŋ bak. Bɔt dis man ya fɔgɛt bɔt Josɛf! I nɔ tɛl Fɛro bɔt Josɛf, ɛn Josɛf kɔntinyu fɔ de na jel.