JOSEFA apa va mu twere koEgipite, age nomvhura dendi 17 tupu. Okwina makura tava ka mu randesa komugara gedina Potifara. Potifara nga ruganene hompa gwaEgipite, ogu ava tumbura asi Farawo.

Josefa nga ruganene unene hekurwendi Potifara. Josefa apa ga kulire, Potifara makura ta mu tura a pangere embo lyendi nalinye. Morwasinke nye ana karere Josefa apa modorongo? Morwa mukadaPotifara.

Josefa kwa kulire ta kara mugara gosipa sosiwa sili, makura mukadaPotifara ta hara kurara nage. Nye Josefa ga divire asi eyi epuko, makura kapi ga yi rugene. MukadaPotifara ta handuka unene. Mugara gwendi apa ga wizire kembo, ta mu kumbagere nokutanta asi: ‘Ogwina Josefa gomudona ka hara asi a rare name!’ Potifara kwa pulire damukadendi, makura ta handukire Josefa. Makura ta ninki va mu ture modorongo.

Mukurona godorongo poopo ta mono asi Josefa mugara gomuwa. Makura ta mu ninki a kare mupangeli govanadorongo vakwawo navenye. Konyima Farawo kwa handukilire mupindi gwendi nomuduvi gwendi, makura ta va tura modorongo. Masiku gamwe navenye kwa rotere nonzodi dokulikarera, nye awo kapi va divire asi yisinke dina kutanta nonzodi dawo. Ezuva lyokukwama ko Josefa ta tanta asi: ‘Tantereni nge nonzodi deni.’ Apa va mu tanterere, makura Josefa, mekwafo lyaKarunga, ta va singonwene ntanto zononzodi dawo.

Komupindi, Josefa kwa tente asi: ‘Momazuva gatatu ove ngava ku pwagesa modorongo, makura ngo kare hena mupindi gwaFarawo.’ Josefa makura ta gwederere ko asi: ‘Apa ngo pwaga, ka tantere Farawo kuhamena nge, o vatere nge ni tunde mo mevango eli.’ Nye komuduvi, Josefa kwa tente asi: ‘Momazuva gatatu Farawo nga ninka va ku tete mutwe goge.’

Konyima zomazuva gatatu ayo kwa horokere nawa-nawa ngomu ga yi tente Josefa. Farawo kwa ninkire muduvi va mu tete mutwe. Nye mupindi kwa mu pwagesere modorongo nokutameka hena kuruganena hompa. Nye mupindi kwa divarere nayinye kuhamena Josefa! Age kapi ga tanterere Farawo kumuhamena, makura Josefa ta kara ngorooro modorongo.

Genesis 39:1-23; 40:1-23.