JOSEFI ali lukoso ne myaka 17 ili bamupinta ku Ijipiti. Kulya bamusitisya ku mwalalume uwe sina lya Potifa. Potifa cilolo icipyungila Falo, imfumu ya Ijipiti.

Josefi alapyungila makosa Potifa sikulu wakwe. Lomba Josefi akula, Potifa amwikalika ukuba icilolo ca ŋanda yakwe yonse. Mba nindo Josefi abela mwi kati? Ni pa mulandu wakwe muka Potifa.

Josefi akula aba musankwa umulombe, kabili umukasi wakwe Potifa alukufwaya ukulala naye. Pano Josefi alisi ati ukucite’fi kubifya, kabili talalepo naye. Umukasi wakwe Potifa akalipa makosa. Popele ili umulume wakwe aisa ku ŋanda, abepa kuli ye ne kulabila ati: ‘Ilya imbifi Josefi yacifwaya ukulala na nebo!’ Potifa aumfwila umukasi wakwe, kabili amufitilwa makosa Josefi. Popele amubika mwi kati.

Mu mpindi iinini uwakulame’kati abona ati Josefi muntu umuweme. Popele amupela amakosa akulama bonse bambi bakaili. Mukukonkapo Falo afitilwa icilolo ca bakupinte’nkomeci yakwe ne ca bepikisi, kabili ababika mwi kati. Bumbi busiku bonse bobilo balota imiloto iilibelele, pano tabesibile ifi imiloto yabo ilukwalula. Akasuba kakonkapo Josefi alabila ati: ‘Mbuleni imiloto yenu.’ Kabili ili bamubula, Josefi, mukuba ne kofwa kwa baLesa, alondolola ifi imiloto yabo ilukwalula.

Ku wakupinte’nkomeci, Josefi alabila ati: ‘Pakupite’nsiku sitatu bakakufumya mwi kati, kabili bakakubwesesya bucilolo bobe ubwakupinte’nkomeci ya mfumu nakabili.’ Popele Josefi kakonkanyapo ati: ‘Ili ukafuma, ukabule Falo ifyakuli nebo, kabili ukangofwe ukufuma muno mwi kati.’ Ku mwipikisi, Josefi alabila ati: ‘Pakupite’nsiku sitatu Falo akakuputulako umutwi obe.’

Pakasuba ka busitatu fyenka filya alabile Josefi fyacitika. Falo aputulako umutwi wa mwipikisi. Uwakupinte’nkomeci, nangabe’fyo, amufumyamo mwi kati kabili atatika ne kupyungila imfumu nakabili. Pano uwakupinte’nkomeci alubako fyonse ifyakuli Josefi! Tamubulilepo Falo ifyakuli Josefi, kabili Josefi aikala mwenka mulya mwi kati.

Ifyakutaŋga 39:1-23; 40:1-23.