ໂຍເຊບຖືກຂັງຢູ່ໃນຄຸກ
ບົດ 22
ໂຍເຊບຖືກຂັງຢູ່ໃນຄຸກ
ໂຍເຊບມີອາຍຸພຽງແຕ່ 17 ປີເທົ່ານັ້ນເມື່ອຖືກພາໄປຍັງອີຢີບ. ນະທີ່ນັ້ນ ເຂົາຖືກຂາຍໃຫ້ຊາຍຄົນນຶ່ງຊື່ໂປຕີຟາ. ໂປຕີຟາເຮັດການໃຫ້ກະສັດແຫ່ງອີຢີບ ຜູ້ມີຊື່ວ່າຟາໂລ.
ໂຍເຊບເຮັດການໜັກໃຫ້ແກ່ໂປຕີຟານາຍຂອງຕົນ. ດັ່ງນັ້ນເມື່ອໂຍເຊບເຕີບໂຕຂຶ້ນ ໂປຕີຟາຕັ້ງເຂົາໃຫ້ເປັນຜູ້ດູແລການງານໃນເຮືອນຂອງຕົນທັງໝົດ. ແຕ່ເປັນຫຍັງໂຍເຊບຈຶ່ງຖືກຂັງຢູ່ໃນຄຸກ? ທັງນີ້ກໍ່ເພາະເມຍຂອງໂປຕີຟານັ້ນເອງ.
ໂຍເຊບໃຫຍ່ຂຶ້ນເປັນຄົນຮູບຮ່າງໜ້າຕາງາມ ແລະເມຍຂອງໂປຕີຟາຕ້ອງການໃຫ້ເຂົານອນກັບຕົນ. ແຕ່ໂຍເຊບຮູ້ການເຮັດເຊັ່ນນີ້ເປັນການຜິດ ແລະເຂົາຈຶ່ງບໍ່ຍອມເຮັດ. ເມຍຂອງໂປຕີຟາມີຄວາມໂກດແຄ້ນຫຼາຍ. ເມື່ອຜົວຂອງນາງກັບບ້ານ ນາງຈຶ່ງເວົ້າຕົວະຕໍ່ເຂົາແລະກ່າວວ່າ: ‘ໂຍເຊບຕົວຊົ່ວນັ້ນໄດ້ພະຍາຍາມນອນນຳເຂົາ’ ໂປຕີຟາເຊື່ອເມຍຂອງຕົນ ຈຶ່ງຄຽດຫຼາຍນຳໂຍເຊບ. ດັ່ງນັ້ນ ຈຶ່ງເອົາໂຍເຊບໄປຂັງໄວ້ໃນຄຸກ.
ບໍ່ດົນຜູ້ຈັດການຄຸກເຫັນວ່າໂຍເຊບເປັນຄົນດີ. ຈຶ່ງຕັ້ງເຂົາໃຫ້ເປັນຄົນດູແລນັກໂທດທັງໝົດ. ຕໍ່ມາຟາໂລມີຄວາມໂກດຮ້າຍຕໍ່ພະນັກງານນ້ຳອະງຸ່ນແລະພະນັກງານເຮັດເຂົ້າຈີ່ຂອງທ່ານ ແລະຈັບພະນັກງານທັງສອງຂັງຄຸກ. ຄືນນຶ່ງພະນັກງານສອງຄົນນັ້ນຕ່າງກໍ່ມີຄວາມຝັນພິເສດ ແຕ່ພວກເຂົາບໍ່ຮູ້ຄວາມໝາຍຂອງຄວາມຝັນຂອງເຂົາ. ມື້ຕໍ່ມາໂຍເຊບບອກວ່າ: ‘ຈົ່ງເລົ່າຄວາມຝັນຂອງເຈົ້າໃຫ້ຂ້ອຍຟັງເຖີດ.’ ແລະເມື່ອເຂົາໄດ້ເລົ່າໃຫ້ຟັງແລ້ວ ໂດຍຄວາມຊ່ວຍເຫຼືອຈາກພະເຈົ້າ ໂຍເຊບກໍ່ອະທິບາຍຄວາມໝາຍແຫ່ງຄວາມຝັນໃຫ້ຟັງ.
ໂຍເຊບກ່າວແກ່ພະນັກງານນ້ຳອະງຸ່ນວ່າ: ‘ພາຍໃນສາມມື້ເຈົ້າຈະຖືກປ່ອຍອອກຈາກຄຸກ ແລະເຈົ້າຈະເປັນພະນັກງານນ້ຳອະງຸ່ນຂອງຟາໂລຄືເດີມອີກ.’ ໂຍເຊບກ່າວເພີ່ມວ່າ: ‘ເມື່ອເຈົ້າອອກແລ້ວ ຈົ່ງແຈ້ງໃຫ້ຟາໂລຊາບເຖິງຂ້ອຍ ແລະຊ່ວຍຂ້ອຍໃຫ້ອອກຈາກສະຖານທີ່ນີ້ດ້ວຍ.’ ໂຍເຊບກ່າວແກ່ພະນັກງານເຮັດເຂົ້າຈີ່ວ່າ: ‘ພາຍໃນສາມມື້ຟາໂລຈະຕັດຫົວຂອງເຈົ້າອອກ.’
ພາຍໃນສາມມື້ກໍ່ເກີດຂຶ້ນຈິງຕາມທີ່ໂຍເຊບບອກໄວ້. ຟາໂລໃຫ້ຕັດຫົວຂອງພະນັກງານເຮັດເຂົ້າຈີ່. ພະນັກງານນ້ຳອະງຸ່ນຖືກປ່ອຍອອກຈາກຄຸກແລະເລີ່ມຮັບໃຊ້ກະສັດອີກ. ແຕ່ພະນັກງານນ້ຳອະງຸ່ນລືມເລື່ອງຂອງໂຍເຊບເສຍ! ເຂົາບໍ່ໄດ້ເລົ່າໃຫ້ຟາໂລຟັງເຖິງເລື່ອງໂຍເຊບ ແລະໂຍເຊບກໍ່ຕ້ອງຢູ່ໃນຄຸກຕໍ່ໄປ.