YOSEFA wādi na myaka 17 paāselelwe ku Edipito. Potifela wāmupota. Potifela wādi wingila kwa mulopwe wa Edipito, witwa bu Felo.

Yosefa wādi wingidila mfumwandi Potifela bininge. Ebiya Yosefa pa kutama, Potifela wāmupa buledi bwa njibo yandi yonso. Mwanda waka kadi Yosefa udi muno mu kifungo? I pa mwanda wa mukaja Potifela.

Yosefa wādi mwana-mulume wa mpala miyampe, papo mukaja Potifela kāabila kulāla nandi. Ino Yosefa wāyukile’mba i kibi, wāpela kulāla nandi. Mukaja Potifela wāloba bininge. Ebiya wandi mulume pa kujoka ku njibo, wāmubepela’mba: ‘Uno Yosefa i muntu mubi, wadi wansake amba alāle nami.’ Potifela wāitabija binenwa bya mukajandi ne kukalabela Yosefa byamwiko’tu. Penepa wāmweleja mu kifungo.

Kepejije kalama wa kifungo wāmona’mba Yosefa i muntu muyampe. Penepa wāmupa kutala babuloko bonso. Kupwa papo Felo wālobela bandi ba kaseya ne mutēki, wēbela mu kifungo. Bufuku bumo, bālota bilotwa bishile na bikwabo, ino kebāyukilepo nshintulwilo yabyo. Ke kesha, Yosefa wānena’mba: ‘Nsapwilei bilotwa byenu.’ Abo pa kumusapwila, Yosefa wēbalombola nshintulwilo yabyo na bukwashi bwa Leza.

Yosefa wānena kaseya’mba: ‘Mu mafuku asatu ukalupulwa mu kifungo, kadi ukekala monka kaseya wa Felo.’ Penepa Yosefa wābweja’ko amba: ‘Pokatamba muno, untela kudi Felo, andupule muno’mu.’ Ino Yosefa wānena mutēki amba: ‘Mu mafuku asatu Felo ukakutyiba mutwe.’

Mu mafuku asatu, byonso byāfikidila monka mwānenene Yosefa. Felo wātyibija mutwe wa mutēki. Ino kaseya aye wālupulwa mu kifungo ne kushilula kwingidila monka mulopwe. Ino kaseya wāilwa Yosefa! Kālombwelepo Felo, penepo Yosefa wāshala mu kifungo.