JOSEFA chu Aigupta-a an kalpui lai chuan kum 17 chauh a ni a. Chutah chuan mi pakhat Potiphara hnenah hralh a ni a. Potiphara chuan Pharaoa an tih, Aigupta lalber tan hna a thawk a ni.

Josefa chu a pu Potiphara tan hna a thawk nasa a. Chuvangin Josefa a upat chuan Potiphara chuan a in pum pui enkawltuah a dah a. A nih, engvanginnge Josefa chu he tan inah hian a awm? Potiphara nupui vang a ni.

Josefa chu mipa hmeltha deuh a rawn ni a, tin Potiphara nupui chuan a hnena mu turin a duh a. Chu chu a dik lo tih Josefan a hria a, a ti lo vang. Potiphara nupui chu a thinrim em em a. Tichuan a pasal lo haw chuan a hnenah dawt a sawi a: ‘He mi tha lo Josefa hian a hnenah mi mut luihtir,’ tiin. Josefa chungah a thinrim ta em em a. Tichuan tan inah a khung ta a ni.

Tan in enkawltu chuan Josefa chu mi tha a ni tih a hre thuai a. Chuvangin mi tang zawng zawng enkawltuah a dah a. A hnuah Pharaoa chu a uain petu leh chhang siamtu chungah a thinur a, tan inah a khung a. Zan khat chu mumang danglam bik an nei ve ve a, mahse an mumang awmzia chu an hre lo. A tukah chuan Josefa chuan: ‘In mumangte mi hrilh rawh u,’ a ti a. An han hrilh chuan, Pathian tanpuinain Josefa chuan an mumang awmziate chu a hrilhfiah a.

Uain petu hnenah chuan, Josefa chuan: ‘Ni thumah tan in ata chhuah i ni ang a, Pharaoa uain petu i ni leh ang,’ a ti a. Josefa chuan: ‘I chhuah hunah, ka chanchin Pharaoa hrilh la, he hmun atanga chhuak turin mi tanpui ang che,’ a tih belh a. Chhang siamtu hnenah erawh chuan, Josefa chuan: ‘Ni thum chiahah Pharaoan i lu a tan ang,’ a ti a.

Ni thumah chuan Josefa sawi ang chiah chuan athleng ta a. Pharaoa chuan chhang siamtu lu a tan a. Uain petu erawh chu tan in ata chhuah a ni a, lalber hna a thawk leh a. Mahse uain petu chuan Josefa chanchin zawng zawng a theihnghilh vek a! A chanchin chu Pharaoa a hrilh lo va, Josefa chu tan inah a awm ta zel a.