NAQ 17 abʼqʼi iqʼin tuʼn José tej t-xi qʼin Egipto. Tej tpon xi kʼayin te jun xjal Potifar tbʼi. Aju xjal lu in naqʼunantoq tukʼe ajkawil te Egipto, aju Faraón tbʼi.

Nim aqʼunan José toj tja Potifar. Tuʼntzunjo, tej tchʼiy José, xi tqʼamaʼn Potifar te tuʼn tok t-xqʼuqin tkyaqilju at toj tja. Qa Ikjo, ¿tiquʼntzun jupuʼnkx Josétz? Tuʼn tpaj t-xuʼjlal Potifar.

Tbʼanelxixtaq kaʼyin José tej tchʼiy, atzun t-xuʼjil Potifar tajbʼiltoq tuʼn tkubʼ kuẍeʼ tukʼe. Atzunte José nyataq taj, quʼn bʼiʼntaq tuʼn qa mya bʼaʼn jlu. Tzaj nim tqʼoj t-xuʼjlal Potifar tuʼn jlu. Tuʼntzunju, tej tul tchmil xi tqʼamaʼn te kyjalu: ‹¡Aju José mya bʼaʼn xjal te, tajtoq tuʼn tkubʼ tan wukʼile!› Xi tbʼiʼn Potifar aju xi tqʼamaʼn t-xuʼjil te, tuʼntzun jlu, jaw qʼojlexix tukʼe José ex okx tjupuʼn.

Aju xqʼuqil kye xjal ateʼkx pres, elnaj tnikʼ qa tbʼanel xjal te José. Tuʼntzunjo, ok tqʼoʼn José te xqʼuqil kye kykyaqil pres. Yajxitl jaw qʼojle Faraón tukʼeju qʼol tkʼaʼ ex tukʼejo bʼinchel tpan ex e okx tqʼoʼn pres. Tojtzun jun qʼonikʼen, ok kywitzikʼ xjal lu teyilex te junjun aju nim toklen, ex mitiʼtoq nel kynikʼ tiʼteq t-xilen jlu. Tuj juntl qʼij tqʼma José kyjalu: ‹Kytxʼolbʼantze weye alkye kywitzikʼe sok›. Tukʼejo onbʼil tzaj tqʼoʼn Dios te José, bʼant tchikʼbʼet kywitzikʼ xjal tuʼn.

Xitzun tqʼamaʼn José te qʼol tkʼaʼ Faraón kyjaʼ: ‹Toj oxe qʼij kʼelex qʼina tzalu ex ok kxel tqʼoʼne juntl maj tkʼaʼ Faraón›. Tuntzunjo, xi tmaʼntl José te: ‹Aj texa tzalu, bʼiʼx yolina wiʼje twitz Faraón ex chin tonintza tuʼn wexe tzalu›. Atzuntl te bʼinchal pan xi tqʼamaʼn José te kyjalu: ‹Naq oxe qʼijtl tuʼn tel qʼiʼn twiʼya tuʼn Faraón›.

Ikxix bʼajju toj toxin qʼij ik tzeʼnj oteq bʼaj tchikʼbʼaʼn José. El tiʼn Faraón twiʼ bʼinchel pan. Atzuntl te qʼol tkʼaʼ etz tiʼn jatumel jupuʼnkxetaq ex ok ten juntl maj aqʼunal te Faraón. ¡Mitiʼtl yolin tiʼj José twitz Faraón tuʼnju ikʼ tnaʼl tuʼn! Tuʼntzunju, kukx kyaj ten José pres.