TOSʼA xjaʼaonjao nóle José nga kikaojen chjota ya Egipto. Ya kisatenatʼale jngo chjota xi Potifar ʼmi. Je Potifar ya kisixákao je xi rey tíjna ya Egipto, xi Faraón tsakʼinle.

José nʼio kisixále Potifar je naile. Kuinga je tsakánesínile ngayeje ndʼiale nga je koanjchínga. Tonga, ánni nga ndoyá kichanísíni José. Totʼatsʼení chjoónle Potifar.

Kʼianga je koanjchínga José naskánakisʼe, kʼoa chjoónle Potifar koanmele nga je koájnakao. Tonga José be nga chʼaotjín jebi, kʼoa koankaile. Nʼio koanjtile chjoónle Potifar. Kʼianga kichó xʼinle, tsakʼéndisole kʼoa kitsole: “¡Je José kamamele nga kabajnakaona!” Koankjainle Potifar jokitsole chjoónle, kʼoa nʼio koanjtile xi kao José. Kʼoa ndoyá kiskaní.

Je xi síkuinda ndoyá sasa tsabeni kʼianga nda chjota José. Kuinga je tsakánesínile ngatsʼi chjota xi ngikʼa xi kʼoati ndoyá tjíoʼya. Xijekoan, je Faraón ndoyá kiskaní choʼndale je xi vino tsjoále kʼoa kao xi síndale nioxtila nga koanjtile xi kao je. Jngo nitjen kʼianga jngo nijñá tsakʼaile nga jao chjota jebi, tonga likui be josʼin tsoyanile. Nga koannyaonni José kitsole: “Tʼeyanajmínao nijñáno”. Kʼoa xijekoan, je José, kao nganʼiole Niná, tsakʼéyanajmíle josʼin tsoyanile nijñále.

Je José kʼoakitsole je xi tsjoále vino Faraón: “Ndʼai jan nichxin kuitjui ndoyá, kʼoa ijngokʼa kʼoainilai vino Faraón”. Kuinga kʼoakitsonile José: “Kʼianga je kuitjui, kʼoatʼinlai Faraón xi tʼatsʼan, kʼoa tisenkaonai nga kuitjoa ibi”. Kʼoa je xi nioxtila sínda kitsole: “Ndʼai jan nichxin koatesinli je Faraón”.

Nga je koanjanni nichxin kʼoakoan jokitso José. Faraón tsakatesin je xi síndale nioxtila. Kʼoa je xi tsjoále vino tsakʼaonsje ndoyá kʼoa kisixá ijngokʼanile je Faraón. ¡Tonga kisichajin xi tʼatsʼe José! Likuini kʼoakitsole Faraón, kʼoa José tojo ya tsakʼejnaʼya ndoyá.