Sturka 22

Josep Ra Silak Ra Mangkan

JOSEP ba Idsipt ra brih wan pyua ra 17 mani baman bri kan. Baha ra brisi waitna kum nina Patipar maki kan ra atkan. Patipar ba Idsipt kingka wal wark taki kan, kingka ba nina Fero maki kan.

Josep ba ai dawanka Patipar dukyara karna wark taki kan. Bara witin pawi tara takan pyua ra, Patipar ai watla bila aiska ba Josep mihta ra mangkan. Baku kaka, dia muni Josep ra silak ra mangkan ki? Patipar maîa mita yaban baku daukan.

Josep ba pawi tara takan pyua ra uba waitna pain kan, baha mita Patipar maîa mairin ba want kan witin wal rug takbia. Sakuna Josep pain nu kan baku daukaia ba saura, baha mita baku daukras kan. Bara baha taka, Patipar maîa ba Josep wal uba ai kupia sauhkan. Bara ai maîa Patipar balan pyua ra, witin naku kunin aisi win: ‘Josep mita taibi ai munan witin wal rug takamna wisi!’ Bara Patipar ai maîa win ba ra rait luki, Josep wal uba ai kupia sauhkan. Baha mita Josep ra yaban silak ra mangkan.

Sakuna silak watla lalka ba Josep ba upla pain kan ba dukyara ai dara walan. Baha mita silak watla uplika nani ba Josep mihta ra mangkan. Sakuna kaina tanira king Fero ba, ai kapka kakahbra bara ai britka aiângkra wal uba ai kupia sauhki, silak ra mangkan. Bara tihmia kum, witin nani kumi bani ba yaprisauhkan kum kaikan, sakuna baha ba dia tanka bri kan sapa nu apu kan. Ban sakuna yu wala, Josep mita witin nani ra win: ‘Yaprisauhkan kaiki bangwram ba ai wis.’ Bara Josep Gâd helpka wal witin nani ra tanka param saki win.

Josep mita kap kakahbra ra naku aisan: ‘Man yu yumhpa ra silak watla wina taki, kli king Fero mawanra kapka kahbi kama.’ Bara pura praki sin win: ‘Man naha wina takma taim, yang dukyra king Fero wal aisas silak wina ai sakaia dukyara.’ Sakuna brit aiângkra ra Josep mita naku aisan: ‘Yu yuhmpa ra Fero silak wina mai saki mai ikbia.’

Bara yu yuhmpa ra Josep dia win ba kat takan. Fero mita brit aiângkra ra ikan. Sakuna kap kakahbra ra silak watla wina sakan, bara kli king ba wal wark takan. Ban sakuna kap kakahbra ba Josep dukyara ai auya tikan! Bara king Fero ra Josep dukyara aisaras kan, baha mita Josep ba ban silak watla ra takaskan.

Blasi sturka 39:1-23; 40:1-23.