Kitsakkej José
Tanojnots 22
Kitsakkej José
JOSÉ sayoj kipiaya 17 xiujmej keman kiuikakej tani itech altepet Egipto. Uan ompa kinamakiltijkej se takat tein motokaytij Potifar. Potifar kitekitiliaya tein tekiuajtia Egipto, tein motokaytij Faraón.
José kiteltekitiliaya iteko, Potifar. Yejika, keman José ueyiak, Potifar kikauak maj kitajpiali ikalijtik. Komo ijkon, ¿keyej kitsakkej José? Ika kikuikej inamik Potifar.
Keman José ueyiak mochiuak se takat tel kuakualtsin, uan inamik Potifar kinekia maj José iuan motekani. Sayoj ika, José kimattoya ika nejon amo kuali, yejika amo kinekik. Inamik Potifar tel kualanik. Yejika, keman inamik ajsik, kitakajkayauilij uan kiiluij: ‘¡Nejon José amo yolkuali kinekia nouan motekas!’ Potifar kineltokilij inamik, uan kitelkualauij José. Yejika tanauatij maj kitsakuakan.
Tein kinitaya tein tsaktoyaj niman kiitak ika José katka se takat yolkuali. Yejika kinkauak imako José nochin tein tsaktoyaj maj yejua kinitani. Satepan Faraón kikualantijkej tein kitayilmakaya uan ipanchiujkauj uan kintsakuak. Se youak, kipiakej sejse takochitalis tein kijtosnekia teisa, sayoj ika yejuan amo kimatiaj toni kijtosnekia. Mostika José kiniluij: ‘Xinechtapouikan tein nankikochitakej’. Ompa, ika inepaleuil Dios, José kimelauak tein kijtosnekia nejon takochitalismej.
José kiiluij tetayilmakakej: ‘Uipta mitskixtiskej, uan oksepa timochiuas tiitayilmakakauj Faraón’. Yejika kijtoj okseki tajtolmej: ‘Keman tikisas, xinechtajtoui iixpan Faraón, uan xinechpaleui maj nikisa’. Sayoj ika José kiiluij panchiujkej: ‘Uipta mitskechkotonas Faraón’.
Uiptika mochiuak ijkon kemej kijtojka José. Faraón kikechkotonak panchiujkej. Sayoj ika, tetayilmakakej kikixtijkej uan oksepa peuak kitayilmaka tekiuaj. ¡Sayoj ika, kielkauak José! Amo kitajtouij iixpan Faraón, uan José kisentokak tsaktoya.
