TLAPOUALISTLI 22

José okitsakuakej itech telpiloyan

JOSÉ kipia 17 xiuitl ijkuak kiuikaj Egipto. Ompa kinemakaj inauak se tlakatl tlen itoka Potifar. Potifar kitekichiuilia ueyi tekiua itech Egipto, tlen kitokayotia Faraón.

José chikauak okitekichiuiliaya iteko, Potifar. Ik non, ijkuak José okipiaya okachi xiuitl, Potifar okitlali ma tlayekana itech ikalijtik. Uan, ¿tleka kajki José itech telpiloyan? Pampa itlajtlakol isiua Potifar.

Ijkuak José omoskalti, kuajkualtsin omoitaya, uan isiua Potifar okinekiaya iuan ma moteka. Maski ijkon, José okimatiaya nin okatka se tlamantli tlen amo kuali, uan amo okinek kichiuas. Isiua Potifar okualanki miak. Ik non, ijkuak inamik oajsik ikalijtik, okikajkaya uan okilui: ‘¡José amo yolkuali, pampa okinekiaya motekas nouan!’. Potifar okineltokili isiua, uan okualanki miak iuan José. Uan otlanauati ma kitsakuakan itech telpiloyan.

Akin otlayekanaya itech telpiloyan san niman okitak José okatka se tlakatl yolkuali. Ik non, okitlali ma tlayekana itech nochtin akinmej otsaktokaj. Satepan, Faraón okualanki miak iuan akin okimakaya vino, uan noijki iuan akin okipanchiuiliaya, uan okintsakuak itech telpiloyan. Se yoak yejuan okipixkej se kochtemikilistli tlen amo okimatiayaj tlen kijtosnekia. Ijkuak omostlatik José okinmilui: ‘Xinechiluikan tlen onankitemikej’. Ijkuakon, José ika ipaleuilis toTajtsin Dios, okinmilui tlen kijtosnekia inkochtemikilis.

José okilui akin okimakaya vino Faraón: ‘Ipan eyi tonalmej tikisas itech telpiloyan, uan oksepa tikmakas vino Faraón’. Ik non, noijki okilui: ‘Ijkuak tikisas, xiktlapoui Faraón itech ne uan xinechpaleui pampa nikisas’. Uan akin opanchiuaya José okilui: ‘San ipan eyi tonalmej Faraón mitskechtsontekis’.

Uan ipan eyi tonal opanok ijkon ken okijto José. Faraón okikechtsontek akin opanchiuaya. Uan akin okitemakaya vino okikixtijkej itech telpiloyan uan oksepa okimakak vino ueyi tekiua. Maski ijkon, okilka José. Amo okitlapoui Faraón, uan José omoka itech telpiloyan.

Génesis 39:1-23; 40:1-23.