JOSEF oku na owala oomvula 17 sho ye ta falwa kuEgipiti. Hoka ye ota landithwa po komulumentu gwedhina Potifar. Potifar oha longele omukwaniilwa gwaEgipiti, i ithanwa Farao.

Josef oha longele omwene gwe Potifar nuudhiginini. Ano Josef sho a koko, Potifar ote mu tula metonatelo lyegumbo lye alihe. Omolwashike nduno Josef e li mpaka mondholongo? Omolwomukiintu gwaPotifar.

Josef ota koko ta ningi omulumentu ngoka e na ondjelo ombwanawa, nomukiintu gwaPotifar okwa hala a lale naye. Ihe Josef oku shi kutya shika osha puka, nota tindi oku shi ninga. Omukiintu gwaPotifar ota geye noonkondo. Ano uuna omulumentu gwe ta galukile kegumbo, ote mu fundju nota ti: ‘Josef ngoka omwiinayi okwa kambadhala a lale nangame!’ Potifar okwi itaale omukiintu gwe, nota geyele Josef noonkondo. Ano ote mu edhilile mondholongo.

Mbala omulumentu omukuluntu gwondholongo ota mono kutya Josef omulumentu omwaanawa. Ano ote mu tula metonatelo lyoonkwatwa adhihe dhilwe. Konima Farao ota geyele omupindi gwe nomuyothi gwiikwiila gwe, note ya edhilile mondholongo. Uusiku wumwe ayehe yaali otaa yaguma ondjodhi, kehe gumwe oyi ili, ihe kaye shi shoka oondjodhi dhawo tadhi ti. Esiku lya landula Josef ota ti: ‘Hokololeni ndje oondjodhi dheni.’ Naashono taye shi ningi, kekwatho lyaKalunga Josef ote ya fatululile oondjodhi dhawo.

Komupindi Josef ota ti: ‘Konima yomasiku gatatu oto ka mangululwa mondholongo noto ka ninga ishewe omupindi gwaFarao.’ Ano Josef ota gwedha po: ‘Ngele wa zi mo, hokololela Farao kombinga yandje, nou kwathe ndje ndi ze mo mehala ndika.’ Ihe komuyothi gwiikwiila Josef ota ti: ‘Konima yomasiku owala gatatu Farao ota ka tetitha ko omutse gwoye.’

Konima yomasiku gatatu otashi ningwa naanaa ngaashi Josef a ti. Farao ota tetitha ko omutse gwomuyothi gwiikwiila. Ihe omupindi ota mangululwa mo mondholongo nota tameke okulongela ishewe omukwaniilwa. Ihe omupindi omukuluntu okwa dhimbwa thiluthilu kombinga yaJosef! Ye ita hokololele nando Farao kombinga ye, ano Josef oku na okukala mondholongo.