KO E 17 laia e tau moui ha Iosefa he magaaho ne ta hifo a ia ki Aikupito. I ai kua fakafua atu a ia ke he tagata taane ne higoa ko Potifara. Ne gahua a Potifara ma e patuiki ha Aikupito, ne higoa ko Farao.

Ne gahua malolō a Iosefa ma e iki haana ko Potifara. Ti ko e magaaho ne lahi hake a Iosefa ne tuku e Potifara a ia ke pule ke he magafaoa katoa haana. Ka ko e ha ko Iosefa a ē he fale puipui? Ha ko e hoana ha Potifara.

Ne tupu hake a Iosefa ke eke mo fuata taane mata mitaki, ti manako e hoana ha Potifara ke momohe mo ia. Ka e iloa e Iosefa kua hepe e mena nei, ti nakai taute e ia. Ne ita lahi e hoana ha Potifara. Ti ko e magaaho ne hau e taane haana ki kaina, ne fakavai a ia he pehē: ‘Ne lali e tagata kelea ko Iosefa ke momohe mo au!’ Ne talitonu a Potifara ke he hoana haana, ti ita lahi a ia ki a Iosefa. Ti tuku e ia a Iosefa he fale puipui.

Ne nakai leva ti kitia he tagata ne leveki e fale puipui ko e tagata mitaki a Iosefa. Ti tuku e ia a Iosefa ke leveki e tau tagata oti i loto he fale puipui. Fakamui, ne ita a Farao ke he tagata taute uaina mo e tagata taute mena kai haana, ti tuku foki a laua he fale puipui. He taha pō, ne igatia a laua mo e miti pauaki, ka e nakai iloa e laua e kakano he tau miti ha laua. He aho hake ne pehē a Iosefa: ‘Talahau mai la ki a au e tau miti ha mua.’ Magaaho ne tala age e laua, ne maeke a Iosefa, ha ko e lagomataiaga he Atua, ke fakamaama e kakano he tau miti ha laua.

Ke he tagata taute uaina, ne pehē a Iosefa: ‘He tolu e aho to fakatoka mai a koe he fale puipui, mo e to liu a koe ke eke mo tagata taute uaina ha Farao.’ Ti lafi e Iosefa: ‘Ka fano a koe, tala age ki a Farao hagaao ki a au, ti lagomatai au ke uta kehe mai he fale nei.’ Ka e ke he tagata taute mena kai, ne pehē a Iosefa: ‘He tolu e aho to hio kehe e Farao e ulu haau.’

He tolu e aho ne pihia e mena ne tupu tuga ni he talahau e Iosefa. Ne poaki a Farao ke hio kehe e ulu he tagata taute mena kai. Ka ko e tagata taute uaina kua fakatokanoa mai a ia he fale puipui ti kamata ke liu fekafekau ke he patuiki. Ka kua nimopō he tagata taute uaina a Iosefa! Ne nakai tala age e ia ki a Farao hagaao ki a Iosefa, ti nofo hifo ni a ia he fale puipui.