JOSE ankho una omanima 17, puetyi atualwa ko Egitu. Ko Egitu alandeswa komulume utiwa o Potifar. Potifar ankho uundapela Farao ohamba yomo Egitu.

Jose ankho uundapela unene omuhona wae Potifar. Moluotyo, etyi ekula, Potifar emupe otyilinga tyokutumina eumbo liae aliho. Iya omokonda yatyi Jose apakelwa mokaleya? Omokonda yomukai wa Potifar.

Jose ankho pahe walinga omulume omuwa unene. Iya omukai wa Potifar ahande Jose alangalepo nae. Anthi, Jose ankho utyii okuti otyo tyapenga, ehetavela. Otyo tyanumanesa unene omukai wa Potifar. Moluotyo, etyi omulume wae eya, omukai oo wemukemba okuti: ‘Ondingavivi ei Jose wahandele okulangalapo naame.’ Potifar etavela komukai wae, anumana unene na Jose. Atumu okumupaka mokaleya.

Omulume ankho wokutumina mokaleya, wamona okuti Jose ondalawa. Moluotyo, emuavela otyilinga tyokutumina ononkhuatwa onokhuavo. Pononthiki opo, ankho Farao wanumana novauundapi vae vevali. Umue wokuyoka onombolo, no mukuavo wokumuavela ovikulia no vinyu, iya evepake mokaleya. Motyinthiki tyimue ovaundapi ovo, valota onondyoi. Mahi ankho kavetyii oityi mbuhangununa. Komuhuka Jose evepopila okuti: ‘Ntholelei onondyoi mbenyi.’ Iya avemutolelambo. Jose evehangununina onondyoi mbavo nekuateso lia Huku.

Jose apopila omuavi wovikulia no vinyu okuti: ‘Konyima yononthiki ononthatu moyovoka mokaleya, okondoka povilinga viove.’ Jose ayawisako okuti: ‘Putyina wamatundumo, kapopile Farao kombinga yange, nkhuateseko okutunda muno.’ Anthi, omuyoki wonombolo, Jose emutolela okuti: ‘Mononthiki ononthatu, Farao mekutete omutwe.’

Konyima yononthiki ononthatu, atyiende umue ngetyi Jose apopile. Omuyoki wonombolo, Farao atumu okumuteta omutwe. Mahi, omuavi wovinyu ayovoka mokaleya, iya ahimbika okuundapela vali Farao. Anthi, ku Jose walimbuako! Kapopilile Farao kombinga ya Jose. Moluotyo, Jose watualako okukala mokaleya.