Yosefu Ateebwa omu Kihome
Ekitebyo 22
Yosefu Ateebwa omu Kihome
YOSEFU akaba aine emyaka 17 yonka ey’obukuru obu yaatwarwa Misri. Okwo baamuguza omushaija orikwetwa Potifaari. Potifaari naakorera omugabe wa Misri, orikwetwa Faraho.
Yosefu naakora n’amaani emirimo ya mukama we, Potifaari. N’ahabw’ekyo Yosefu ku yaakuzire, Potifaari yaamuheereza obushoboorozi bw’okureeberera enju ye yoona. Kandi shi, ahabw’enki Yosefu hanu ari omu kihome? N’ahabw’omukazi wa Potifaari.
Yosefu akura aba omushaija murungi munonga omu ndebeeka, kandi muka Potifaari ayenda ngu abyame nawe. Kwonka Yosefu naamanya ngu eki ni kibi, kandi tarikubaasa kukikora. Omukazi wa Potifaari agira ekiniga kingi munonga. N’ahabw’ekyo iba ku agaruka omu ka, amubeiha arikugira ati: ‘Yosefu ogwo omubi yaagyezaho kumpamba!’ Potifaari aikiriza ebi omukazi we yaagamba, kandi agirira Yosefu ekiniga kingi. Atyo aragiira ngu bamute omu kihome.
Omurinzi w’ekihome omu mwanya mukye areeba ngu Yosefu n’omushaija murungi. Atyo amuha ogw’okureeberera abandi basibe boona. Bwanyima Faraho akwatirwa omugabuzi we wa viinyo n’omuteeki we w’emigaati ekiniga, atyo abata omu kihome. Ekiro kimwe, bombi buri omwe aroota ekirooto ky’omutaano, kwonka tibamanya makuru g’ebirooto byabo. Ekiro ekyakuratiireho, Yosefu abagira ati: ‘Mmungambire ebirooto byanyu.’ Ku babimugambira, Yosefu n’obuhwezi bwa Ruhanga, ashoboorora amakuru g’ebirooto byabo.
Yosefu agambira ati omugabuzi wa viinyo: ‘Omu biro bishatu noija kurekurwa kuruga omu kihome, kandi nooza kugaruka obe omugabuzi wa viinyo ahari Faraho.’ Atyo Yosefu amugira ati: ‘Ku oraabe waarugiremu, ongambe ahari Faraho, kandi onyambe onyihise omuri ogu mwanya.’ Kwonka ahari omuteeki w’emigaati, Yosefu agira ati: ‘Omu biro bishatu byonka Faraho naija kukutemaho omutwe.’
Omu biro bishatu bibaho nk’oku Yosefu yaagambire. Faraho atemaho omutwe gw’omuteeki w’emigaati. Kwonka omugabuzi wa viinyo we, arekurwa kuruga omu kihome kandi agaruka kuheereza omugabe. Kwonka omugabuzi wa viinyo ayeberwa kimwe Yosefu! Tagambira Faraho ebirikumukwataho, atyo Yosefu aguma omu kihome.
