ZUZE akhana magole 17 yakubadwa yokha pomwe adayendesedwa ku Edjipito. Kumweko iye adagulisidwa kuna mwamuna munango dzina lace Potifari. Potifariyo akhaphatira basa mambo wa ku Edjipito, wakucemeredwa Farawo.

Zuze akhaphatira basa Potifari na nyongo. Tenepo, pomwe iye adakula, Potifari adamuikha kukhala nyakuyang’anira nyumba yace yense. Tsono thangwe ranyi Zuze ali m’kawoko? Ni thangwe ra mkazi wa Potifari.

Zuze adakula, acikhala mwamuna wa mawonekedwe yabwino, ndipo mkazi wa Potifari adafuna kugona naye. Tsono Zuze akhadziwa kuti n’kuphonyeka, ndipo adalamba kucita bzimwebzo. Mkazi wa Potifariyo adakalipa kwene-kwene. Tenepo, pomwe bayace adafika pa muipo, iye adanamizira Zuze, aciti: ‘Zuze wakuipayu akhafuna kugona nane!’ Potifari adakhulupira mkazace ule, ndipo adakalipa naye Zuze. Tenepo, adakamuikha m’kawoko.

Munthu omwe akhambayang’anira m’kawokomo, adawona kuti Zuze akhali munthu wabwino. Tenepo, iye adamuikha kuti ambayang’anire wanthu wense wa m’kawoko mule. Patsogolo pace, Farawo adakalipa na womwe akhamupasa bzakumwa na nyakumuphikira mikate, ndipo awadaikha m’kawoko. Usiku bunango, awiriwo wadalota bzinthu bzakupambulika, tsono wakhadziwa lini thandauzo la malotoyo. Mangwana yace Zuze adati: ‘Ndiuzeni bzomwe mwalotabzo.’ Ndipo pomwe iwo wadamuuza, Zuzeyo mwakuthandizidwa na Mulungu, adawafokotozera thandauzo la maloto yawoyo.

Kuna nyakupereka bzakumwa ule, Zuzeyo adati: ‘Mu nsiku zitatu, iwepo unicosedwa m’kawoko muno, ucikapitiriza kupasa bzakumwa Farawo.’ Tsono Zuze adamuuzambo kuti: ‘Ukacoka, kandiuzirembo Farawo bza inepano, ucindithandiza kucoka m’mbuto ino.’ Tsono kuna nyakumbaphika mikate ule, Zuze adati: ‘Mu nsiku zitatu, Farawo an’dzagwata msolo wako.’

Zitamala nsiku zitatuzo, bzidacitikadi bzomwe Zuze akhadalewabzo. Farawo adagwata msolo wa nyakumbaphika mikate ule. Tsono nyakumbapereka bzakumwa ule, adacosedwa m’kawokomo, acikatumikira pomwe Farawo. Tsono iye adayebwa bzense bzomwe Zuze akhadamuuza! Iye alibe kukalewa kwa Farawo bza Zuzeyo, ndipo iye adapitiriza kukhala m’kawoko mule.