SE̱HE̱ 17 yä je̱ya mi pe̱ꞌtsi rä Jose nuꞌmu̱ bi tsꞌitsꞌi ha Ejipto. Rä Jose bi ꞌma ko rä Potifar. Rä Potifar mi mpe̱fi pa näꞌä rä ndä de ha Ejipto mrä thuhu rä Faraon.

Rä Jose xi mi mpe̱fi pa rä hmuu, rä Potifar. Hänge nuꞌmu̱ mi nja rä je̱ya rä Jose, rä Potifar bi mändabi dä supäbi gatꞌho rä nguu. Nuꞌmu̱, ¿por hanja rä Jose o ha rä fadi? Go rä tsꞌoki rä ꞌme̱hñä rä Potifar.

Mi te rä Jose, näꞌä nꞌa mrä ñꞌo̱ho̱ xa mähotho, hänge rä ꞌme̱hñä rä Potifar mi ne xä ñꞌähui rä Jose. Pe rä Jose himbi ne ngeꞌä mi pädi ge nunä nꞌa rä tsꞌo tꞌo̱tꞌe. Rä ꞌme̱hñä rä Potifar xa bi nkue̱. Hänge mi zo̱ho̱ rä däme bi xipi näꞌä hingä mäjuäni ꞌne bi ꞌñembi: “¡Nuni rä Jose, rä tsꞌo jäꞌi ngeꞌä mi ne xä jaki xtä äꞌmee!”. Rä Potifar bi gamfribi rä ꞌme̱hñä, ꞌne xi bi bo̱ rä kue̱ ko rä Jose. Bi mända dä jotꞌi ha rä fadi.

Näꞌä toꞌo mi su rä fadi, nguntꞌä bi da ngue̱nda ge rä Jose mrä hojäꞌi. Hänge bi hñutsꞌi pa go dä su gatꞌho nuꞌu̱ märꞌa yä yꞌofadi. Mꞌe̱fa, rä Faraon bi nkue̱ ko näꞌä rä ꞌme̱go mrä hñäxä binu ꞌne ko näꞌä rä hyokä thuhme, ꞌne bi yꞌe̱ntꞌä ha rä fadi. Nꞌa rä xui, nuyu̱ yoho yä jäꞌi bi ꞌui nꞌa rä tꞌi pe himi pädi te ri bo̱ni. Rä hyaxꞌä, rä Jose bi ꞌñenä: “Xikägihu̱ te gä ꞌuihu̱”. ꞌNe ko rä mfatsꞌi Äjuä, rä Jose bi mää te mri bo̱ni nuꞌu̱ yä tꞌi.

Rä Jose bi xipi näꞌä rä hñäxä binu: “Di ꞌme̱di hñupa pa gi po̱ni de rä fadi, ꞌne mänꞌaki ma gi umbäbi rä binu rä Faraon”. Hänge rä Jose bi ꞌñembäbi: “Xki po̱ni de gekua, xipäbi rä Faraon de geke ꞌne faxkägi gä po̱ni de gekua”. Pe rä Jose bi xipi näꞌä rä hyokä thuhme: “Se̱he̱ di ꞌme̱di hñupa, ꞌne rä Faraon ma dä hye̱kꞌäꞌi ri ñäxu”.

Mi thogi hñupa, bi thogi gatꞌho näꞌä xki mängä rä Jose. Rä Faraon bi hye̱kuäbi rä ñäxu näꞌä rä hyokä thuhme. Pe näꞌä rä hñäxä binu, bi bo̱ni de ha rä fadi ꞌne bi me̱päbi mänꞌaki rä Faraon. ¡Pe näꞌä rä jäꞌi bi pumfri rä Jose! Himbi xipäbi rä Faraon de rä Jose, hänge rä Jose mi odä ha rä fadi.