EGIPTO markaman apakuyaptinshi 17 watayoqllaraq kanaq José. Tsëchöshi Potifar shutiyoq nunata rantikïkuyänaq. Faraón nishqan shutiyoq Egiptochö reypaqshi uryanaq Potifarqa.

Patronnin Potifarpaqshi alläpa alli uryëkunaq José. Tsëshi llapan wayinta encarguëkunaq Josëta poquriptin. Tsëpenqa, ¿imanir-raq carcelchö llawirëkan José? Potifarpa warminrëkurshi.

Potifarpa warminshi Josëwan punukïkïta munanaq poqurnin shumaqyäriptin. Pero Josëqa manash munanaqtsu, tsë alläpa mana alli kanqanta musyar. Tsënash alläpa piñëkunaq Potifarpa warminqa. Tsë ‘¡mana alli nuna Josëmi noqawan punukïkïta munashqa!,’ nishpanash ulikurkur qowan Potifarta willarinaq. Tsënash warminta creirnin Potifarqa Josëta carcelman llawiratsinaq.

José alli nuna kanqantash cuentata qokurin carcelchö llawiraqkuna rikaq nuna. Tsënash wakin llawiraqkunata rikänampaq Josëta churarinaq. Huk kutinash piñakurkur carcelman llawiratsinaq Faraón tanta masaqnintawan vino sirveqninta. Y huk ampinash, kë nunakuna suëñokuyänaq mana imëpis suëñokuyanqannö, pero significädontaqa manash ni mëqan musyayänaqtsu. ‘Suëñïnikikunata willarayämë,’ nishpash waränin José kë ishkanta ninaq. Kë suëñïninkunapa significädontash Jehoväpa yanapëninwan Josëqa willarinaq.

Vino sirveqtam nerqan: ‘Yapëmi Faraonpa vino sirveqnin kanki y kima hunaqllachömi carcelpeq yarqunki,’ nishpa. Hina ninaqshi: ‘Këpita yarqurïkorqa Faraonta noqapita parlapanki, y këpita yarqunäpaq yanapëkamë,’ nishpa. Pero tanta masaqtanash ninaq: ‘Faraonqa kima hunaqllachönam peqëkita roquramonqa,’ nishpa.

José nenqannöshi kima hunaqchö tsë llapan pasanaq. Tanta masaqpataqa peqantash roqurinaq Faraón. Pero carcelpitash yapë reyta servinampaq horqariyänaq vino sirveqtaqa. Pero kë nunaqa ¡qonqarinaqshi Josëta! Manash Faraonta Josëpita parlapänaqtsu, tsëshi pëqa carcelchö quedakunaqraq.