JOSEYQA 17 watanpi kachkaptillanraqmi Egipto nacionman aparqaku. Chaypim Potifar sutiyoq runaman rantikururqaku. Potifarqa Egiptopi kamachikuq reypaq llamkarqa, chay reytaqa Faraon nispam suticharqaku.

Joseymi sinchillataña patronnin Potifarpaq llamkarqa. Chaymi, Joseyqa yuyayniyoqña karuptin patronnin Potifarqa wasinpi tukuy kapuqninkunata cuidananpaq churarqa. Hinaptinqa, ¿imamantataq Joseyqa carcelpi kachkan? Potifarpa warminpa huchanmanta.

Josey qespisqa runaña kaspanmi allin rikchayniyoq buenmozo karqa, chaymi Potifarpa warminqa paywan puñunanta munarqa. Joseymi yachan chaynata rurayqa mana allin kasqanta, hinaspa mana munanchu. Hinaptinmi Potifarpa warminqa llumpayllataña piñakururqa. Hinaspa qosan kutiramuptin llullakuspa nin: ‘¡Chay pusamusqayki Joseymi yaykumuwarqa ñoqawan puñuyta munaspa!’ nispa. Potifarmi warminpa nisqanta creeruspan Joseypaq sinchita piñakururqa. Chaymi presokunapa kasqan carcelman churarachin.

Carcel cuentallikuqmi chaylla Joseymantaqa musyarurqa allin runa kasqanta. Chaymi carcelpi llapallan presokunata entregaykurqa payña cuentallikunanpaq. Chaymantam rey Faraonpas vino serviqpaq panaderokunapa jefenpaqpas piñakurusqa carcelman churarachirqa. Hinaptinmi huk tutallapi iskayninku sapaq mosqoyta mosqokurqaku, ichaqa manam yachankuchu ima ninanta. Paqarinnintinta Josey paykunata nirqa: ‘Willawaychik mosqoynikichikta’ nispa. Hinaptinmi Joseyqa Diospa yanapakuyninwan mosqoyninkupa ima ninanta willan.

Vino serviqtam Josey nirqa: ‘Kimsa punchawmantam carcelmanta lloqsinki, hinaspa Faraonman yapamanta copata servinki.’ Joseymi kaytawan nirqa: ‘Lloqsiruspaykiqa ama hina kaspaykimá rey Faraonta rimaykapuwanki kay carcelmanta horqowananpaq.’ Panaderopa jefentañataqmi nirqa: ‘Kimsa punchawmantam Faraon umaykita qorusunki’ nispa.

Kimsa punchawpim Joseypa nisqanman hina rurakurqa. Faraonmi panaderopa umanta qorururqa. Vino serviqtam carcelmanta horqochimurqa hinaspa Faraonman kaqllamanta vinota servirqa. ¡Payñataqmi Joseytaqa qonqarurqa! Faraonmanqa manam imatapas Joseymantaqa willanchuqaya, hinaptinmi Joseyqa carcelpiraq quedakurqa.