JOSEP i gat 17 krismas tasol taim ol i kisim em i go long Isip. Ol i salim em long wanpela man, nem bilong em Potifar. Potifar i wanpela ofisa bilong king bilong Isip, em Fero.

Josep i save wok strong long mekim ol wok bilong Potifar. Olsem na taim Josep i kamap bikpela, Potifar i makim em long bosim olgeta samting long haus bilong em. Orait, bilong wanem na Josep i stap long kalabus? Long wanem, meri bilong Potifar i sutim tok giaman long em.

Taim Josep i go bikpela, skin bilong em i naispela tru, na meri bilong Potifar i laik Josep i slip wantaim em. Tasol Josep i save dispela i no stret, na em i no laik mekim. Meri bilong Potifar i kros tru. Olsem na taim man bilong em i kam long haus, em i giaman na tok, ‘Josep i laik slip wantaim mi!’ Potifar i bilipim tok bilong meri bilong em, na em i kros tru long Josep. Olsem na em i putim Josep long kalabus.

Bos bilong kalabus i lukim olsem Josep em i gutpela man. Olsem na em i putim em i stap bosboi bilong ol arapela kalabusman. Bihain Fero i kros long tupela wokboi bilong em, em man i save lukautim wain bilong king na man i lukautim haus bret, na em i putim ol long kalabus. Long wanpela nait tupela i kisim narapela kain driman, tasol ol i no save long mining bilong driman. Long neks de Josep i tok: ‘Tokim mi long ol driman bilong yutupela.’ Na taim ol i stori pinis long Josep, God i helpim em na em i kamapim mining bilong driman bilong ol.

Josep i tokim man i save lukautim wain: ‘Tripela de moa na bai yu lusim kalabus na mekim gen wok bilong lukautim wain bilong Fero.’ Na Josep i tok moa: ‘Taim yu lusim kalabus, yu mas tokim Fero long mi, na helpim mi long lusim kalabus.’ Na em i tokim man i lukautim haus bret, olsem: ‘Tripela de moa na bai Fero i katim nek bilong yu.’

Tripela de bihain ol samting i kamap olsem Josep i tok. Fero i tok na ol i katim nek bilong man i lukautim haus bret. Man bilong lukautim wain i lusim kalabus na mekim gen wok bilong king. Tasol em i lusim tingting olgeta long Josep! Em i no tokim Fero long Josep, olsem na Josep i stap yet long kalabus.