КАЖАН Ио́сифти Еги́петче аппаарга, ол чүгле 17 харлыг турган. Аңаа ону Потифар деп кижиге садыпкан. Потифар Еги́петтиң хааны — фарао́нга бараан болуп турар.

Ио́сиф бодунуң дээргизи Потифарга ак-сеткилдиг бараалгап турар. Ынчангаш Ио́сиф өзүп келирге, Потифар ону бодунуң аал-оранының кол эргелекчизи кылдыр тургузуп каан. Ындыг болза-даа Ио́сиф чүге бо кара-бажыңда олурары ол? Потифарның кадайы дээш.

Ио́сиф аажок чараш эр кижи апарган, ынчангаш Потифарның кадайы Ио́сиф-биле кады чыдарын күзеп турар. Ынчалза-даа Ио́сиф билир — ол чорук шын эвес, ынчангаш ону кылырын күзевейн турар. Потифарның кадайы ол дээш хөлчок хорадап турар. Ынчангаш ашаа чанып кээрге, ол аңаа: ‘Бо кара-сагыштыг Ио́сиф мээң-биле чыдарын оралдажып турду!’ — деп мегелээн. Потифар бодунуң кадайынга бүзүрээш, хөлчок хорадап килеңнээн. Шак ол дээш Ио́сифти кара-бажыңче киир октапкан.

Удаваанда кара-бажыңның эргелекчизи Ио́сифти эки кижи деп эскерип каан. Ынчангаш ол ону өске бүгү херектээннерниң хайгааракчызы кылдыр тургускан. Элээн каш үе эрткенде фараон бодунуң хлеб быжырыкчызынга болгаш арага кудукчузунга килеңнээш, оларны кара-бажыңнап каан. Бир-ле катап олар иелээ бир тускай дүштер көрген, ынчалза-даа ооң утказын билбейн турар. Дараазында хүн Ио́сиф дилээн: ‘Меңээ дүштериңерни чугаалап бериңерем’. Кажан олар чугаалаарга, Ио́сиф Бурганның дузазы-биле ооң утказын тайылбырлап турар.

Арага кудукчузунга: ‘Үш хонук болгаш сени кара-бажыңдан үндүрүптер, сен база катап фарао́нга арага сунукчузу бооп бараалгаар сен. — Ынчангаш Ио́сиф немээн: — Хосталып үнгеш, фарао́нга мээң дугайымда чугаалап, моон үнеринге дузалажып берип көрем’. Хлеб быжырыкчызынга Ио́сиф чугаалаан: ‘Таптыг-ла үш хүн эрткенде фарао́н сээң бажыңны одура шааптар’.

Үш хүн эрткен соонда, бүгү чүве Ио́сифтиң чугаалааны-биле дөмей, ол-ла хевээр болган. Хлеб быжырыкчызының бажын одура шаапкан. Арага сунукчузун хостаптарга, ол база катап хаанга бараалгап эгелээн. Ынчалза-даа арага сунукчузу Ио́сифтиң дугайында көңгүс уттупкан! Ол фарао́нга ооң дугайында чугаалаваан, ынчангаш Ио́сиф улаштыр кара-бажыңга олурар ужурга таварышкан.