Yosefa o vha e na miṅwaha ya 17 musi a tshi iswa Egipita. Henengei a rengiselwa munna a no pfi Potifara. Potifara o vha a tshi shumela khosi ya Egipita, i vhidzwaho Farao.

Yosefa a shumela muṋe wawe, Potifara. Musi Yosefa a tshi aluwa, Potifara a mu vhea muhulwane wa nnḓu yawe. Ndi ngani-ha, Yosefa e afha dzhele? Ndi nga mulandu wa musadzi wa Potifara.

Yosefa o aluwa a vha munna wa u naka, nahone musadzi wa Potifara a mu ṱoḓa uri a lale nae. Fhedzi Yosefa a hana. Musadzi wa Potifara a sinyuwa zwihulu. Musi munna wawe a tshi vhuya, a mu zwifhela a ri: ‘Houḽa Yosefa muvhi o lingedza u lala na nṋe!’ Potifara a tenda musadzi wawe, a sinyutshela Yosefa. Ngauralo a ita uri a dzheniswe dzhele.

Muhulwane wa dzhele a ṱavhanya a zwi vhona uri Yosefa ndi munna wavhuḓi. A mu vhea muhulwane wa zwiṅwe zwivhotshwa. Nga murahu Farao a sinyutshela mufareli wawe wa tshinwelo na mubikeli wawe, a vha dzhenisa dzhele. Vhuṅwe vhusiku vhoṱhe vha vha na miḽoro yo khetheaho, fhedzi vha si ḓivhe zwine ya amba. Ḓuvha ḽi tevhelaho Yosefa a ri: ‘Mmbudzeni miḽoro ya vhoinwi.’ Vha tshi mu vhudza, Yosefa a thuswa nga Yehova a ṱalutshedza miloro yavho.

Kha mufari wa tshinwelo, Yosefa a ri: ‘Murahu ha maḓuvha mararu u ḓo bviswa dzhele, wa dovha wa vha mufari wa tshinwelo tsha Farao.’ Yosefa a engedza: ‘Musi u tshi bva, u vhudze Farao nga ha nṋe, u nthuse u bva fhano.’ Fhedzi kha mubiki Yosefa a ri: ‘Murahu ha maḓuvha mararu Farao u ḓo u tumula ṱhoho.’

Murahu ha maḓuvha mararu zwa itea samusi Yosefa o amba. Farao a ita uri ṱhoho ya mubiki i tumulwe. Mufari wa tshinwelo, na ene a bviswa dzhele a dovha a shumela khosi. Fhedzi mufari wa tshinwelo a hangwa zwoṱhe nga ha Yosefa! A si vhudze Farao nga hae, nahone Yosefa a fanela u dzula dzhele.

Genesi 39:1-23; 40:1-23