HI Jose 17 anyos la han gindara hiya ha Ehipto. Didto, iginbaligya hiya kan Potipar. Nagtatrabaho hi Potipar ha hadi han Ehipto nga tinatawag nga Paraon.

Maduruto nga nagtrabaho hi Jose ha iya agaron nga hi Potipar. Salit han daku na hi Jose, hiya an gintaporan ni Potipar ha iya bug-os nga panimalay. Kondi, kay ano nga napriso hi Jose? Tungod ito han asawa ni Potipar.

Gwapo hi Jose, salit karuyag han asawa ni Potipar nga dumirig hi Jose ha iya. Kondi maaram hi Jose nga sayop ito, ngan diri gud niya bubuhaton ito. Nasina gud an asawa ni Potipar. Salit, han inuli an iya bana, nagbuwa hiya: ‘Salbahis gud hi Jose, nagpirit hiya nga dumirig ha akon!’ Tinuod hi Potipar ha iya asawa, ngan nasina gud hiya kan Jose. Salit iginpapriso ni Potipar hi Jose.

Naobserbahan dayon han tinaporan ha prisohan nga buotan hi Jose. Salit igintapod niya kan Jose an ngatanan nga priso. Inabot an panahon, nasina hi Paraon ha iya paratagay ngan parahimo hin tinapay, salit ginpriso hira. Usa ka gab-i, nagkaada hira nga duha hin naiiba nga inop, kondi diri hira maaram han kahulogan hito. Kinabuwasan, hi Jose nagsiring: ‘Sumati ako han iyo inop.’ Ngan han iginsumat nira ito, iginsaysay ni Jose an kahulogan hito pinaagi han bulig han Dios.

Hi Jose nagsiring ha paratagay: ‘Tulo na la ka adlaw, makakagawas ka na, ngan magigin paratagay ka utro ni Paraon.’ Ngan hi Jose nagsiring pa: ‘Paggawas mo, sumati hi Paraon mahitungod ha akon, ngan buligi ako nga makagawas dinhi.’ Kondi hi Jose nagsiring ha parahimo hin tinapay: ‘Tulo na la ka adlaw, papupugotan ka ni Paraon.’

Paglabay hin tulo ka adlaw nahitabo an ginsiring ni Jose. Ginpapugotan ni Paraon an parahimo hin tinapay. Kondi, ginpagawas ha prisohan an paratagay ngan nagserbi utro ha hadi. Kondi hinngalimtan niya hi Jose! Waray niya sumati hi Paraon mahitungod kan Jose, salit nagpabilin hi Jose ha prisohan.